راولپنڈی: اسپیشل جج سینٹرل راولپنڈی عبدالرحمان عارف نے ایک سرکاری ادارے کے ڈرائیور کو شہریوں سے دھوکہ دہی اور رقم ہتھیانے کے جرم میں 37 سال قید بامشقت کی سزا سنادی ہے۔ مجرم پر 20 لاکھ روپے جرمانہ اور متاثرہ شہری کو 37 لاکھ 40 ہزار روپے واپس ادا کرنے کا بھی حکم دیا گیا۔
عدالت میں پیش کی گئی تفصیلات کے مطابق مجرم نے شہری کو سرکاری ملازمت کا جھانسہ دے کر 46 لاکھ 60 ہزار روپے ہتھیا لیے تھے۔ ایف آئی اے کے اینٹی کرپشن ونگ نے یہ مقدمہ گزشتہ برس درج کیا تھا، جس کی پیروی کے بعد آج عدالت نے جرم ثابت ہونے پر فیصلہ سنا دیا۔
عدالت نے جیسے ہی فیصلہ سنایا، کمرہ عدالت میں موجود پولیس اہلکاروں نے مجرم کو ہتھکڑیاں لگا کر حراست میں لے لیا۔ جج نے اپنے فیصلے میں کہا کہ "مجرم نے نہ صرف مالی نقصان پہنچایا بلکہ سرکاری اداروں پر عوام کے اعتماد کو بھی ٹھیس پہنچائی۔"