کراچی میں اسٹریٹ کرائم کی صورتحال بدستور تشویشناک ہے، رواں سال کے ابتدائی دو مہینوں میں 10 ہزار سے زیادہ وارداتیں رپورٹ ہوچکی ہیں۔
پولیس کی جاری کردہ رپورٹ کے مطابق جنوری اور فروری 2025 میں اسٹریٹ کرائم کے 10 ہزار 356 کیسز درج ہوئے۔ رپورٹ میں بتایا گیا کہ ان دو ماہ میں ڈکیتی مزاحمت کے دوران 12 افراد جان سے گئے جبکہ 41 زخمی ہوئے۔
اس عرصے میں 2806 موبائل فون چھینے گئے، جبکہ 306 گاڑیاں اور 7244 موٹر سائیکلیں چوری یا چھینی گئیں۔
رپورٹ کے مطابق روزانہ کی بنیاد پر تقریباً 48 موبائل فون، 5 گاڑیاں اور 125 موٹر سائیکلیں جرائم پیشہ افراد کے ہاتھ لگیں۔
پولیس کے مطابق پچھلے سال 2024 کے انہی دو مہینوں میں 14 ہزار 419 اسٹریٹ کرائم کے واقعات رپورٹ ہوئے تھے، جس کے مقابلے میں اس سال اسٹریٹ کرائم کی شرح میں 28 فیصد سے زائد کمی دیکھنے میں آئی ہے۔
پولیس رپورٹ میں یہ بھی واضح کیا گیا کہ 2024 کے پہلے دو ماہ میں ڈکیتی مزاحمت کے نتیجے میں 32 شہری قتل اور 99 زخمی ہوئے تھے، جبکہ اس دوران 4120 موبائل فون، 335 گاڑیاں اور 9964 موٹر سائیکلیں چھینی یا چوری کی گئی تھیں۔