راولپنڈی: سابق وزیرِ داخلہ شیخ رشید احمد نے کہا ہے کہ حکومت کا مسئلہ مہنگائی یا بے روزگاری نہیں بلکہ عمران خان کی گرفتاری ہے۔
سماجی رابطے کی ویب سائٹ ٹوئٹر پر اپنے پیغام میں عوامی لیگ کے سربراہ شیخ رشید احمد نے سابق صدرکو تنقید کا نشانہ بناتے ہوئے کہا کہ آصف علی زرداری کہتے ہیں ڈیفالٹ ہونا معمول کی بات ہے کیونکہ ان کی رقم باہر چلی گئی۔
ٹوئٹر پیغام میں سابق وزیرِ داخلہ شیخ رشید احمد نے کہا کہ سابق صدر نے یہ اس لیے کہا کیونکہ ان کی دولت پاپڑ والے یا دہی بلے والے کے ذریعے ملک سے باہر منتقل ہوچکی ہے۔ بلو رانی امریکا میں بلو کے گھر ویمن ڈے منا رہی ہے۔
عوامی لیگ کے سربراہ شیخ رشید نے کہا کہ آئی ایم ایف سے معاملات طے نہیں ہوپارہے۔ حکومت غریب کے مسائل حل کرنے کی بجائے اپنے مفادات حل کر رہی ہے۔ پاکستان کو غریب کیلئے ڈیتھ زون بنا دیا گیا ہے۔
سابق وزیرِ داخلہ شیخ رشید احمد نے کہا کہ حکومت کا مسئلہ مہنگائی، بے روزگاری یا معاشی تباہی نہیں بلکہ صرف عمران خان کی گرفتاری ہے جو مہنگی پڑے گی اور بڑی غلطی ثابت ہوگی۔
عوامی لیگ کے سربراہ نے کہا کہ الیکشن کے معاملے پر اگر حکومت سپریم کورٹ کے فیصلے بھی نہیں مانتی تو پھر قوم کدھر جائے؟ حکومتی اتحاد میں پھوٹ پڑ چکی ہے۔ دو نہیں، ایک انتخاب کا فیصلہ بھی جلد ہوگا۔