آواران : بلوچستان ضلع آواران کے علاقہ کھورو میں سیکیورٹی فورسز اور دہشت گردوں کے درمیان فائرنگ کے تبادلے میں دو دہشت گرد ہلاک اور 2 جوان شہید ہوگئے۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کی جانب سے بیان میں کہا گیا ہے کہ بلوچستان میں سیکیورٹی فورسز اور دہشت گردوں کے درمیان فائرنگ کا تبادلہ ہوا، واقعہ بلوچستان ضلع آواران کےعلاقہ کھورومیں پیش آیا۔
آئی ایس پی آر کا کہنا تھا کہ اس دوران فورسز نے موثرانداز میں دہشت گردوں کے ٹھکانے کو نشانہ بنایا، فائرنگ کے تبادلے میں دو دہشت گرد ہلاک اور دو زخمی ہوئے۔
ترجمان نے بتایا کہ فائرنگ کے تبادلے نائب صوبیدار آصف عرفان اور سپاہی عرفان علی نے بہادری سے لڑتے ہوئے جام شہادت نوش کیا، شہید سینتیس سالہ نائب صوبیدار آصف کا تعلق اوکاڑہ سے تھا جبکہ شہید بائیس سالہ سپاہی عرفان علی سرگودھا کا رہنے والا تھا۔
آئی ایس پی آر کا کہنا ہے کہ علاقے میں ممکنہ دہشت گردوں کے خاتمے کیلئے سرچ آپریشن کیا گیا، سیکیورٹی فورسز دہشت گردی کی لعنت کے خاتمے کے لئے پرعزم ہے، ہمارے بہادرسپاہیوں کی قربانیاں عزم کو مزید مضبوط کرتی ہیں۔