وفاقی وزیر مذہبی امور سردار یوسف نے اعلان کیا ہے کہ حج 2025 میں پاکستانی عازمین کو بہترین اور مثالی سہولیات فراہم کی جائیں گی۔ ان کے بقول، اس سال ہر حاجی "وی وی آئی پی" انداز میں فریضہ حج ادا کرے گا۔
حج کانفرنس سے خطاب کرتے ہوئے سردار یوسف نے کہا کہ پاکستان کی جانب سے ماضی کی کوتاہیوں کو تسلیم کیا گیا ہے اور اب ان غلطیوں کی اصلاح کا مکمل ارادہ ہے۔ ان کے مطابق، تمام پیسے جو پورٹل کے ذریعے جمع ہوئے، وہ ضائع نہیں ہوں گے بلکہ مستحق جگہوں پر استعمال ہوں گے۔
انہوں نے واضح کیا کہ وزارت کو صرف ایک ماہ قبل سنبھالا ہے، اور ان کے اولین اہداف میں بہترین حج کا انعقاد شامل ہے۔ سعودی عرب میں پاکستانی سفیر اور حکام کی مدد سے اضافی حج کوٹہ حاصل کرنے کی کوششیں کی گئیں، جس کے نتیجے میں سعودی حکومت نے پاکستان کو مزید 10 ہزار حاجیوں کی اجازت دی ہے۔
سردار یوسف نے زور دے کر کہا کہ یہ اضافی کوٹہ سرکاری نہیں بلکہ پرائیویٹ اسکیم کے تحت ہے، اور کچھ لوگ جو اس پر غلط معلومات پھیلا رہے ہیں، وہ حقیقت سے ہٹ کر ہیں۔