سوات: سیکیورٹی فورسز اور قانون نافذ کرنے والے اداروں نے 18 اپریل کو سوات کے ایک علاقے میں خفیہ اطلاعات پر کامیاب کارروائی کرتے ہوئے 4 خوارجی دہشت گردوں کو ہلاک کر دیا۔ آئی ایس پی آر کے مطابق یہ مشترکہ آپریشن انٹیلی جنس معلومات کی بنیاد پر کیا گیا، جس میں دہشت گردوں کے ایک ٹھکانے کو مؤثر انداز میں نشانہ بنایا گیا۔
کارروائی کے دوران مارے جانے والے دہشت گرد ماضی میں علاقے میں متعدد تخریبی سرگرمیوں میں ملوث رہے تھے، جن میں سیکیورٹی فورسز اور شہریوں کو نشانہ بنایا گیا۔ آپریشن کے دوران بھاری مقدار میں اسلحہ اور گولہ بارود بھی برآمد کر لیا گیا۔
آئی ایس پی آر کے مطابق علاقے میں تاحال کلیئرنس اور سینیٹائزیشن آپریشن جاری ہے تاکہ علاقے کو مکمل طور پر دہشت گردی سے پاک کیا جا سکے۔ ترجمان کا کہنا تھا کہ ملک سے دہشت گردی کے ناسور کے خاتمے کے لیے سیکیورٹی فورسز پرعزم ہیں۔