خیبرپختونخوا کے پہاڑی اور میدانی علاقوں میں قدرت کی ایک اور آزمائش نے لوگوں کی زندگی اجیرن بنا دی ہے۔ چترال سے باجوڑ تک، سوات سے کوہستان اور بٹگرام تک، موسم نے اچانک انگڑائی لی اور آندھی و بارشوں کے طوفان سے کئی علاقے تباہی کا منظر پیش کرنے لگے۔
ضلع خیبر میں ایک ایف سی اہلکار اس وقت آسمانی بجلی کا نشانہ بن گیا جب وہ ڈیوٹی پر تعینات تھا۔ اسی ضلع میں ایک گاڑی سیلابی ریلے کی نذر ہوگئی۔ بٹگرام کے باسی اُس وقت سکتے میں آگئے جب پہاڑوں سے آنے والا ریلا ان کی موٹرسائیکلیں بہا کر لے گیا۔
بارشوں نے جہاں کسانوں کی امیدوں پر پانی پھیر دیا، وہیں باغات اور فصلیں بھی شدید متاثر ہوئیں۔ خاص طور پر مالاکنڈ اور مانسہرہ کے کسانوں کا کہنا ہے کہ ان کے آم، خوبانی، اور مکئی کی فصل بارش اور ژالہ باری سے تباہ ہو گئی ہے۔
لوگ اب دعا گو ہیں کہ موسم مزید سخت نہ ہو۔ تاہم، محکمہ موسمیات کی نئی پیشگوئی نے تشویش میں مزید اضافہ کر دیا ہے، جس کے مطابق آج بھی کئی علاقوں میں آندھی، بارش اور ژالہ باری متوقع ہے۔
مقامی انتظامیہ اور امدادی ادارے متحرک ہیں، لیکن متاثرہ علاقوں کے لوگ حکومت سے مزید مؤثر اقدامات اور ریلیف کی اپیل کر رہے ہیں۔