اسلام آباد: الیکشن کمیشن آف پاکستان نے مالی سال 2022-23ء کے اثاثوں اور گوشواروں کی تفصیلات جمع نہ کرانے پر قومی و صوبائی اسمبلی کے 24 سابق ارکان کو نااہل قرار دے دیا۔
الیکشن کمیشن کی جانب سے جاری کردہ فیصلے کے مطابق، ان تمام ارکان نے اثاثوں کی لازمی تفصیلات فارم بی کے تحت جمع نہیں کروائیں۔ نتیجتاً، یہ افراد اب تاحکمِ ثانی کسی بھی عام، ضمنی یا سینیٹ انتخابات میں حصہ لینے کے اہل نہیں ہوں گے جب تک کہ مطلوبہ تفصیلات فراہم نہ کر دیں۔
نااہل ہونے والے سابق ارکان میں قومی اسمبلی کے 10، سندھ اسمبلی کے 7 اور بلوچستان اسمبلی کے 7 ارکان شامل ہیں۔ ان میں خرم دستگیر خان، محسن نواز رانجھا، محمد عادل، رانا محمد اسحاق خان، کمال الدین، عصمت اللہ، ثمینہ مطلوب، نصیبہ، شمیم آرا پنور اور روبینہ عرفان شامل ہیں۔
سندھ اسمبلی کے سابق اراکین میں عدیل احمد، حزب اللہ بھگیو، ارسلان تاج، عارف مصطفی جتوئی، عمران علی شاہ، علی غلام اور طاہرہ شامل ہیں۔
بلوچستان اسمبلی سے میر سکندر علی، میر محمد اکبر، سردار یار محمد رند، عبدالرشید، عبدالواحد صدیقی، میر حمال اور بی بی شاہینہ بھی نااہل قرار پائے ہیں۔