ہواوے نے اسپیشل انویسٹمنٹ فیسلیٹیشن کونسل (ایس آئی ایف سی) کے تعاون سے 3 لاکھ پاکستانیوں کے لیے آئی ٹی تربیت کا ایک بڑا منصوبہ شروع کرنے کا اعلان کیا ہے۔ اس منصوبے کے تحت 60 ہزار افراد کو جدید آئی ٹی مہارتیں سکھائی جائیں گی، جبکہ باقی 2 لاکھ 40 ہزار کو بنیادی آئی ٹی تربیت فراہم کی جائے گی۔
حکومت کے مطابق، یہ اقدام نہ صرف ملک کے ڈیجیٹل انفراسٹرکچر کو مضبوط کرے گا بلکہ آئی ٹی برآمدات اور ملازمت کے مواقع میں بھی اضافہ کرے گا۔ اسی سلسلے میں، ہائر ایجوکیشن کمیشن (ایچ ای سی) اور ہواوے کے اشتراک سے 15 جامعات میں جدید آئی ٹی کورسز متعارف کرائے جائیں گے۔
ایس آئی ایف سی ملک کے ٹیلی کام سیکٹر میں سرمایہ کاری اور ترقی کے فروغ میں ایک اہم کردار ادا کر رہا ہے۔ ماہرین کا کہنا ہے کہ یہ منصوبہ نوجوانوں کو تکنیکی مہارتیں فراہم کرنے اور معیشت کو ڈیجیٹل ترقی کی راہ پر گامزن کرنے میں ایک سنگ میل کی حیثیت رکھتا ہے۔