پنجاب پولیس کی خاتون افسر ایس پی عائشہ بٹ نے بین الاقوامی سطح پر پاکستان کا پرچم بلند کر دیا۔ انہیں "ایکسلی لینس ان پرفارمنس ایوارڈ 2025" کے لیے نامزد کر لیا گیا ہے۔
پنجاب پولیس کے ترجمان کے مطابق انٹرنیشنل ایسوسی ایشن آف ویمن پولیس نے عائشہ بٹ کو غیر معمولی کارکردگی اور پولیسنگ کے شعبے میں نمایاں خدمات انجام دینے پر اس ایوارڈ کے لیے چُنا ہے۔
ایوارڈ کی باقاعدہ تقریب ستمبر 2025 میں گلاسگو، اسکاٹ لینڈ میں منعقد ہونے والی 62ویں سالانہ کانفرنس میں ہوگی، جہاں انہیں اس اعزاز سے نوازا جائے گا۔
عائشہ بٹ اس وقت گوجرانوالہ میں سٹی ٹریفک افسر (CTO) کے طور پر فرائض انجام دے رہی ہیں اور ان کی خدمات کو قومی اور بین الاقوامی سطح پر سراہا جا رہا ہے۔
آئی جی پنجاب ڈاکٹر عثمان انور نے عائشہ بٹ کو شاندار کارکردگی پر مبارکباد دیتے ہوئے کہا کہ ان کی یہ کامیابی پوری پنجاب پولیس، بالخصوص خواتین افسران کے لیے باعث فخر ہے۔
یہ ایوارڈ ہر سال دنیا بھر کی ایک بہترین خاتون پولیس افسر کو دیا جاتا ہے، اور عائشہ بٹ نے اپنی صلاحیتوں سے اس عالمی اعزاز کو اپنے نام کر لیا ہے۔