پشاور: الخدمت فاؤنڈیشن نے ہمیشہ کی طرح امسال بھی عیدالفطر کے موقع پر یتیم بچوں، اسٹریٹ چلڈرن اور تھیلیسیمیا کے مریضوں میں عیدی اور تحائف تقسیم کیے۔
عید کے دوسرے روز الخدمت ہاؤس سکندر ٹاؤن پشاور میں ایک تقریب منعقد ہوئی، جس کی صدارت الخدمت فاؤنڈیشن خیبرپختونخوا کے صدر خالد وقاص نے کی، جبکہ جماعت اسلامی خیبرپختونخوا وسطی کے امیر عبدالواسع مہمانِ خصوصی تھے۔
اس موقع پر خالد وقاص نے بتایا کہ الخدمت فاؤنڈیشن صوبے میں ساڑھے پانچ ہزار سے زائد یتیم بچوں کی کفالت کر رہی ہے، جبکہ رمضان میں بھی غریب اور ضرورت مند طبقات کی مدد کا سلسلہ جاری رہا۔
انہوں نے مزید کہا کہ 850 سے زائد اسٹریٹ چلڈرن، جو کچرے سے ناکارہ اشیاء اکٹھی کرکے اپنے گھر والوں کی مدد کرتے ہیں، اور 600 سے زائد تھیلیسیمیا کے مریض بچے الخدمت فاؤنڈیشن کے ساتھ رجسٹرڈ ہیں، جن کی دیکھ بھال کی جا رہی ہے۔
مہمانِ خصوصی عبدالواسع نے تقریب سے خطاب کرتے ہوئے الخدمت فاؤنڈیشن کی خدمات کو خراج تحسین پیش کیا اور کہا کہ یتیم بچوں اور مستحق افراد کی کفالت ایک عظیم خدمت ہے۔ انہوں نے کہا کہ الخدمت فاؤنڈیشن پاکستان میں خدمتِ خلق کا ایک بڑا اور معتبر ادارہ ہے، جس کی خدمات پوری قوم کے لیے باعثِ فخر ہیں۔