اسلام آباد: اسلامی نظریاتی کونسل نے قرار دیا ہے کہ اگر کوئی شخص بغیر اجازت دوسری شادی کرتا ہے تو پہلی بیوی کو فسخ نکاح کا حق دینا شریعت کے مطابق درست نہیں۔ کونسل کے مطابق، ایسا کوئی بھی عدالتی فیصلہ شرعی اصولوں سے متصادم ہوگا۔
کونسل کے اجلاس میں نکاح سے قبل زوجین کے تھیلیسیمیا یا دیگر متعدی امراض کے ٹیسٹ کو نکاح نامے کا اختیاری حصہ بنانے کی سفارش کی گئی، تاہم نکاح کا انعقاد فریقین کی مرضی اور رضا مندی پر ہی منحصر ہوگا۔
اجلاس میں یہ بھی تجویز دی گئی کہ اسلامی اصطلاحات جیسے نماز، آیت، مسجد وغیرہ کے انگریزی تراجم سے اجتناب کیا جائے اور ان کے اصل عربی الفاظ ہی استعمال کیے جائیں۔ مزید برآں، بجلی چوری جیسے مسائل کی روک تھام کے لیے علمائے کرام اور دانشوروں کو متحرک کردار ادا کرنے پر زور دیا گیا۔
کونسل نے سرکاری ملازمین کے لیے کنٹریبیوٹری پنشن فنڈ کے نفاذ پر مؤقف اختیار کیا کہ نئے ملازمین کو اس کا پابند بنایا جا سکتا ہے، تاہم پرانے ملازمین کو زبردستی اس میں شامل نہیں کیا جا سکتا۔ مزید یہ کہ اس فنڈ کو سودی نظام سے مکمل طور پر الگ رکھنا ضروری ہے۔
اس اجلاس میں انسانی دودھ بینک کے قیام سے متعلق امور پر بھی بحث ہوئی، تاہم مزید تحقیق اور مشاورت کے لیے اس معاملے کو آئندہ اجلاس تک ملتوی کر دیا گیا۔