اسلام آباد: پاکستان ریلوے نے بلوچستان میں معطل ٹرین آپریشنز کی بحالی کا اعلان کر دیا ہے۔ جعفر ایکسپریس پر دہشت گرد حملے کے بعد ٹرین سروس روک دی گئی تھی، تاہم اب مختلف ٹرینوں کی بحالی کا شیڈول جاری کر دیا گیا ہے۔
ریلوے حکام کے مطابق، 40-DN جعفر ایکسپریس 27 مارچ 2025 سے پشاور سے کوئٹہ کے لیے بحال ہوگی، جبکہ 39-UP جعفر ایکسپریس سبی سے پشاور بھی اسی تاریخ سے اپنی سروس دوبارہ شروع کرے گی۔ اسی طرح، 39-UP ایکسپریس کوئٹہ سے پشاور 28 مارچ 2025 سے بحال ہوگی، اور 3-UP کراچی ایکسپریس 31 مارچ 2025 سے کوئٹہ کے لیے دوبارہ چلائی جائے گی۔
عید اسپیشل ٹرین اور سیکیورٹی اقدامات
پاکستان ریلوے نے عید الفطر کے موقع پر خصوصی ٹرین سروس کا بھی اعلان کیا ہے۔ عید اسپیشل ٹرین 29 مارچ 2025 کو کوئٹہ سے پشاور روانہ ہوگی تاکہ مسافروں کو سفری سہولت فراہم کی جا سکے۔
پاکستان ریلوے پریم یونین کے صدر شیخ محمد انور نے بلوچستان میں ٹرین آپریشنز کی بحالی کو خوش آئند قرار دیتے ہوئے کہا کہ یہ اقدام سفری مشکلات کم کرنے میں مدد دے گا۔ انہوں نے وزیر ریلوے حنیف عباسی کے فیصلے کو سراہتے ہوئے کہا کہ بولان ایکسپریس کو روزانہ چلانے کا فیصلہ ریلوے مسافروں کے لیے مثبت پیش رفت ہے۔
ریلوے حکام کے مطابق، ریلوے اسٹیشنز اور املاک کی سیکیورٹی سخت کرنے کے لیے 500 نئی بھرتیوں کی منظوری دی گئی ہے، جن میں 70 فیصد کوٹہ بلوچستان کے لیے مخصوص کیا گیا ہے۔ اس اقدام سے سیکیورٹی مزید مؤثر ہوگی اور ریلوے نظام کا تحفظ یقینی بنایا جا سکے گا۔