پنجاب میں 25 سے 27 مارچ تک بارشوں کی پیشگوئی، محکمہ موسمیات کا الرٹ جاری

محکمہ موسمیات نے پنجاب کے بیشتر علاقوں میں 25 سے 27 مارچ کے دوران بارشوں کا امکان ظاہر کر دیا ہے۔ اس سلسلے میں پنجاب ڈیزاسٹر مینجمنٹ اتھارٹی (پی ڈی ایم اے) نے متعلقہ اداروں کو الرٹ رہنے کی ہدایت جاری کر دی ہے۔

بارشوں کا سلسلہ راولپنڈی، جہلم، اٹک، چکوال، سرگودھا، میانوالی، خوشاب، منڈی بہاوالدین، شیخوپورہ، حافظ آباد، گجرانوالہ، گجرات، سیالکوٹ، نارووال، فیصل آباد اور ٹوبہ ٹیک سنگھ میں متوقع ہے۔

اس کے علاوہ، ملتان، ڈیرہ غازی خان، راجن پور، بہاولپور، خانیوال، لیہ، بھکر، ساہیوال اور پاکپتن میں بھی بارش ہونے کی توقع ہے۔

ترجمان پی ڈی ایم اے نے خبردار کیا ہے کہ مری، گلیات اور دیگر پہاڑی علاقوں میں برفباری کا بھی امکان ہے، جس کے باعث سفر کرنے والوں کو احتیاط برتنے کی ہدایت کی گئی ہے۔