نئے سال کا آغاز ہوگیا ہے اور لوگ اس موقع پر بہت سی چیزوں کے بارے میں سوچتے ہیں جو ان کے خیال میں نئے برس کے دوران انہیں حاصل کرنی چاہئے، مگر سب سے اہم چیز یعنی اپنی صحت کو اکثر نظرانداز کردیتے ہیں۔
جب بات صحت اور غذائیت کی ہو تو لوگ کافی الجھن کا شکار ہوجاتے ہیں یہاں تک کہ ماہرین بھی لگتا ہے کہ جیسے ایک دوسرے سے متضاد آرا رکھتے ہیں۔
تاہم تمام تر عدم اتفاق کے باوجود کچھ چیزیں ایسی ہیں جن کی سائنس نے ٹھوس انداز سے تصدیق کی ہے۔
تو ایسے ہی بہترین طبی ٹپس جانیں جو کہ سائنسی شواہد پر مبنی ہیں۔
ناشتہ کرنا نہ بھولیں
اس کی متعدد وجوہات ہیں، دن کی پہلی غذا سے میٹابولزم حرکت میں آتا ہے اور بعد میں زیادہ کھانے سے روکتا ہے، اس سے ہٹ کر مختلف طبی تحقیقی رپورٹس میں یہ بات سامنے آچکی ہے کہ صحت بخش ناشتہ کرنا دفتری امور کو بہتر طریقے سے کرنے میں مدد دیتا ہے، جبکہ ناشتہ کرکے تعلیمی اداروں میں جانے والے بچے پڑھائی میں زیادہ بہتر کارکردگی دکھاتے ہیں، ضروری نہیں کہ ناشتے میں بہت زیادہ کھائیں مگر کچھ نہ کچھ ضرور کھائیں۔
میٹھے مشروبات سے گریز
میٹھے مشروبات موٹاپے کا سبب بننے والی وہ سب سے مضر چیز ہے جو آپ جسم کا حصہ بناتے ہیں، اس کی وجہ یہ ہے کہ سیال شکل میں چینی میں موجود کیلوریز کو دماغ اس طرح شمار نہیں کرتا جس طرح ٹھوس غذا کو کرتا ہے۔ یہی وجہ ہے کہ جب کوئی سافٹ ڈرنک یا سوڈا پیتا ہے تو حد سے زیادہ کھالیتا ہے مگر احساس نہیں ہوتا۔ اسی طرح یہ مشروبات موٹاپے، ذیابیطس ٹائپ ٹو، امراض قلب اور ہر طرح کے طبی مسائل کا باعث بھی بن سکتے ہیں۔ یہ بھی ذہن میں رہے کہ فروٹ جوسز بھی سافٹ ڈرنکس جتنے ہی برے ہیں کیونکہ ان میں بھی بہت زیادہ چینی ہوتی ہے اور اس میں موجود اینٹی آکسائیڈنٹس مضر اثرات کی روک تھام میں مددگار ثابت نہیں ہوتے۔
مناسب مقدار میں پانی پینا
جسم کے لیے پانی کی اہمیت سے انکار ممکن نہیں اور مناسب مقدار میں پانی پینا اولین ترجیح ہونا چاہئے کیونکہ اس سے نہ صرف جسمانی وزن میں کمی لانے میں مدد ملتی ہے بلکہ مختلف عوارض سے بھی تحفظ ملتا ہے جو ڈی ہائیڈریشن کی شکل میں آپ کو شکار بناسکتے ہیں، اگر سادہ پانی زیادہ پسند نہیں تو اس میں لیموں کا عرق ڈال کر بھی پی سکتے ہیں۔
ورزش کا وقفہ
ضروری نہیں کہ سخت جسمانی ورزش ہی کی جائے، ہفتہ بھر میں 5 روز صرف آدھے گھنٹے کی چہل قدمی بھی مختلف امراض کو دور رکھنے کے لیے کافی ثابت ہوتی ہے جبکہ دیگر فوائد الگ حاصل ہوتے ہیں۔ اگر 30 منٹ مسلسل چلنا بھی ممکن نہیں تو تھوڑی تھوڑی دیر بعد تیز چہل قدمی سے بھی مدد حاصل کی جاسکتی ہے۔
آف لائن ہونا
کیا بہت زیادہ ای میلز اور سوشل میڈیا چیک کرتے ہیں؟ یقیناً پیاروں کی اپ ڈیٹس ایک کلک کے فاصلے پر ہوتی ہیں، مگر کیا رات کو کسی دوست کے کھانے کی تصویر دیکھنا واقعی ضروری ہوتا ہے؟ اگلی صبح تک انتظار کرنا ممکن ہے، رات کو گھر میں سب اکاﺅنٹس سے لاگ آف ہوکر فون ایک طرف رکھ دیں۔ جب اسکرین ٹائم کم ہوگا تو آپ دیگر کاموں کے لیے آزاد ہوں گے جیسے چہل قدمی، مطالعہ یا رشتے داروں سے ملاقاتیں۔
کچھ نیا سیکھیں
نئی چیزوں کو سیکھنا دماغ کو صحت مند رکھتا ہے، اب یہ تو آپ کے اوپر ہے کہ کیا نیا سیکھنا چاہئے اب یہ نئی زبان ہوسکتی ہے یا کچھ اور، نئی چیز کو سیکھنے کے لیے دماغ کو جو مشقت کرنا پڑتی ہے اس سے بڑھتی عمر کے آثار کی رفتار سست ہوجاتی ہے جبکہ الزائمر جیسے جان لیوا مرض سے بچنا بھی ممکن ہوجاتا ہے۔
تمباکو نوشی اور الکحل چھوڑ دیں
اگر تو آپ تمباکو نوشی کرتے ہیں، تو غذا اور ورزش کی فکر چھوڑیں، پہلے اس عادت پر قابو پائیں۔ اسی طرح الکحل بھی اگر زندگی کا حصہ ہے تو اس کو بھی چھوڑ دیں کیونکہ جگر کے امراض کا سب سے بڑا سبب یہی عادت ہے۔
اچھی نیند
مناسب نیند کی اہمیت سے انکار ممکن نہیں، یہ صحت کے لیے غذا اور ورزش جتنی اہم ہے۔ نیند کی کمی انسولین کی حساسیت کا باعث بنتی ہے جبکہ جسمانی اور ذہنی کارکردگی میں کمی آتی ہے۔ اسی طرح یہ جسمانی وزن یا موٹاپے کا باعث بننے والا بہت بڑا سبب بنتا ہے، ایک تحقیق کے مطابق نیند کی کمی بالغ افراد میں موٹاپے کا خطرہ 55 فیصد تک بڑھا دیتی ہے۔
مسلز ٹریننگ
وزن اٹھانے والی ورزشوںکے نتیجے میں جسم کو چربی کو مسلز بڑھانے کے لیے استعمال کرنے میں مدد ملتی ہے، یعنی آپ جتنی زیادہ کیلوریز خرچ کریں گے اتنا ہی فائدہ ہوگا، یعنی جسمانی وزن کنٹرول میں رہے گا، دل صحت مند جبکہ ہڈیاں مضبوط ہوں گی۔ ہفتے میں کم از کم 2 بار ان ورزشوں کو کرنا عادت بنالیں۔
گھر سے باہر نکلیں
ماضی قریب میں وٹامن ڈی کے لیے لوگوں کو زیادہ محنت نہیں کرنا پڑتی تھی بلکہ سورج کی روشنی اس میں مدد دیتی تھی مگر آج کے دور میں مسئلہ یہ ہے کہ لوگ باہر بہت کم نکلتے ہیں یا سورج کی روشنی میں کم گھومتے ہیں یا سن اسکرین استعمال کرتے ہیں۔ وٹامن ڈی کی کمی مختلف عوارض کا خطرہ بڑھاتی ہے جبکہ اس کی جسم میں مناسب مقدار ہڈیوں کی صحت اور مضبوطی کے لےی ضروری ہے، مایوسی اور کینسر کا خطرہ کم کرتی ہے، اس کے لیے آپ طبی ماہر کے مشورے سے کسی سپلیمنٹ کا استعمال کرتے ہیں، اگر سورج کی روشنی میں گھومنا زیادہ پسند نہیں۔
سبزیاں اور پھل کھائیں
سبزیاں اور پھل تو صحت کے لیے قدرتی غذا قرار دیئے جاتے ہیں اور اس کی اچھی وجہ بھی ہے، یہ فائبر، وٹامنز، منرلز اور ایسے اینٹی آکسائیڈنٹس سے بھرپور ہوتے ہیں جو کہ اچھی صحت کے لیے ضروری ہیں۔ مختلف طبی تحقیقی رپورٹس کے مطابق جو لوگ پھلوں اور سبزیوں کا زیادہ استعمال کرتے ہیں، وہ لمبی زندگی بھی پاتے ہیں جبکہ امراض قلب، ذیابیطس ٹائپ ٹو، موٹاپے اور دیگر متعدد امراض کا خطرہ بھی کم ہوجاتا ہے۔
ڈائٹنگ سے ہمیشہ دور رہیں
وزن کم کرنے کے لیے اگر کھانا چھوڑنے کا سوچ رہے ہیں تو جان لیں کہ اس کا فائدہ نہیں بلکہ نقصان زیادہ ہوتا ہے، کیونکہ یہ عارضی طور پر تو وزن کم کرنے میں مدد دینے والا طریقہ ہے مگر مستقبل میں وزن کو بہت زیادہ بڑھا دیتا ہے۔ وزن کی کمی کے لیے زیادہ بہتر غذائی انتخاب، جسمانی سرگرمیاں کو اپنانے کو ترجیح دی جانی چاہئے۔
دماغ تازہ دم کریں
مراقبہ یا پھولوں کی مہک سونگھنا جیسے عام کام بھی دماغ کو تازہ دم کردیتے ہیں، اس سے ذہنی تناﺅ کم ہوتا ہے، جسمانی درد میں کمی جبکہ مزاج خوشگوار ہوتا ہے۔ ایک تحقیق میں دریافت کیا گیا کہ محض 8 ہفتے روزانہ کچھ دیر مراقبہ کرنے سے دماغ کے ان حصوں میں تبدیلی آتی ہے جو جذبات، سیکھنے اور یاداشت سے جڑے ہوتے ہیں۔
فاسٹ فوڈ فائدہ مند نہیں
پراسیس شدہ جنک فوڈ وہ سبب ہیں جس کے باعث آج دنیا پہلے سے زیادہ موٹاپے اور بیماریوں کا شکار ہورہی ہے، یہ برگر، پیزا، فرنچ فرائیز اور ایسی ہی اشیاءپر مشتمل یہ غذا دماغ کے نظام کو بھی متاثر کرتی ہے اور ہم ضرورت سے زیادہ کھا لیتے ہیں بلکہ کچھ افراد میں تو یہ لت کی شکل اختیار کرلیتی ہے۔ ان میں فائبر، پروٹین اور دیگر فائدہ مند اجزاءبہت کم ہوتے ہیں مگر ریفائن اجناس اور چینی جیسے صحت کے دشمنوں کی مقدار بہت زیادہ ہوتی ہے۔ ایسا نہیں کہ بالکل نہ کھائیں مگر اسے لت بنانے سے گریز کریں۔