اسلام آباد۔پاکستان مسلم لیگ (ق) کے نائب صدر اور سابق وزیرِ اعلیٰ پنجاب چوہدری پرویز الٰہی نے قومی اسمبلی کی نشست این اے 65 چکوال چھوڑنے کا فیصلہ کرلیا، جس پر ضمنی انتخاب میں ممکنہ طور پر پارٹی سربراہ چوہدری شجاعت حسین الیکشن لڑیں گے۔میڈیا رپورٹ کے مطابق چوہدری پرویز الٰہی نے اس نشست پر سابق رکنِ قومی اسمبلی سردار ممتاز ٹمن کو مسلم لیگ (ق) کا ٹکٹ دینے کی۔
پیشکش کی تاہم سردار ممتاز ٹمن نے چوہدری پرویز الٰہی کو مشورہ دیا ہے وہ اس نشست پر پارٹی سربراہ چوہدری پرویز شجاعت حسین کو ضمنی انتخاب میں کامیاب کروا کر قومی اسمبلی میں بھیجیں۔سردار ممتاز ٹمن نے چوہدری پرویز الٰہی کو مشورہ دیتے ہوئے کہا کہ چوہدری شجاعت حسین کو اسمبلی میں ہونا بہت ضروری ہے تاہم ضمنی انتخابات میں انہیں اس نشست سے الیکشن لڑوایا جائے۔انہوں نے کہاکہ چوہدری شجاعت حسین بابائے سیاست ہیں اور انہوں نے ملک کی بہتری کیلئے بہت کام کیے ہیں تاہم ان کا پارلیمنٹ میں ہونا ضروری ہے۔چوہدری پرویز الٰہی نے سردار ممتاز ٹمن کی انتخابات میں حمایت کو سرہاتے ہوئے کہا کہ انہوں نے چکوال سے مسلم لیگ (ق) کو انتخابات میں کامیاب کروایا۔
بعد ازاں 25 جولائی کو عام انتخابات میں حصہ نہ لینے والے چوہدری شجاعت حسین نے این اے 65 چکوال سے چوہدری پرویز الٰہی کی چھوڑی ہوئی نشست پر الیکشن لڑنے کا فیصلہ کیا۔واضح رہے کہ چوہدری شجاعت حسین اس وقت مسلم لیگ (ق) کے صدر ہیں جبکہ 2002 سے 2007 تک مسلم لیگ (ق) کی حکومت کے دوران 30 جون 2004 تا 26 اگست 2004 تک ملک کے 14ویں وزیرِاعظم بھی منتخب ہوئے۔
ماضی میں چوہدری شجاعت حسین وزیر اطلاعات و نشریات، وزیر صحت و پیداوار، وزیرِ داخلہ، وزیر برائے نارکوٹکس کنٹرول مقرر ہوئے اس کے علاوہ بطور سینیٹر وہ پارلیمانی لیڈر، قائمہ کمیٹی برائے دفاع کے چیئرمیں اور قائمہ کمیٹی برائے پیداوار اور سول ایوی ایشن کے چیئرمین کے بھی فرائض انجام دے چکے ہیں ٗخیال رہے کہ سردار ممتاز ٹمن نے 2013 کے انتخابات میں مسلم لیگ (ن) کے ٹکٹ پر الیکشن میں حصہ لیا تھا تاہم 2018 کے انتخابات میں دوبارہ ٹکٹ نہ ملنے پر انہوں نے مسلم لیگ (ق) کے امیدوار (چوہدری پرویز الٰہی) کی حمایت کا اعلان کردیا تھا۔