.jpg)
قومی کرکٹ ٹیم کے اسٹار فاسٹ بولر شاہین شاہ آفریدی نے ون ڈے انٹرنیشنل کرکٹ میں اہم سنگِ میل عبور کرتے ہوئے تیز ترین 150 وکٹیں حاصل کرنے والے پاکستانی فاسٹ بولر بننے کا اعزاز حاصل کرلیا۔
شاہین آفریدی نے یہ کارنامہ لاہور کے قذافی اسٹیڈیم میں سہ ملکی ون ڈے سیریز کے چوتھے میچ میں انگلینڈ کے خلاف انجام دیا۔ اس کامیابی کے ساتھ انہوں نے پاکستان کے سابق فاسٹ بولرز وقار یونس اور شعیب اختر کا ریکارڈ پیچھے چھوڑ دیا۔
دستیاب اعداد و شمار کے مطابق وقار یونس اور شعیب اختر نے ون ڈے انٹرنیشنل میں 91، 91 میچز کھیل کر 150 وکٹیں مکمل کی تھیں، جبکہ شاہین آفریدی نے اس سنگِ میل تک پہنچنے کیلئے اس سے کم میچز کھیلے۔
تاہم تمام پاکستانی بولرز کا مجموعی ریکارڈ دیکھا جائے تو ون ڈے کرکٹ میں تیز ترین 150 وکٹیں مکمل کرنے کا اعزاز سابق آف اسپنر ثقلین مشتاق کے پاس ہے، جنہوں نے 78 میچز میں یہ کارنامہ انجام دیا تھا۔
عالمی سطح پر نیپال کے اسپنر سندیپ لامیچانے 73 میچز میں 150 وکٹیں حاصل کرکے اس فہرست میں سرفہرست ہیں، جبکہ آسٹریلیا کے فاسٹ بولر مچل اسٹارک نے 77 میچز میں یہ سنگِ میل عبور کیا۔ ثقلین مشتاق 78 میچز کے ساتھ اس فہرست میں نمایاں مقام رکھتے ہیں۔
افغانستان کے راشد خان اور بھارت کے محمد شامی نے 80، نیوزی لینڈ کے ٹرینٹ بولٹ نے 81 جبکہ آسٹریلیا کے بریٹ لی نے 82 میچز میں 150 ون ڈے وکٹیں مکمل کیں۔
دوسری جانب ٹیسٹ کرکٹ میں پاکستان کی جانب سے تیز ترین 150 وکٹیں حاصل کرنے کا اعزاز وقار یونس اور یاسر شاہ کے پاس مشترکہ طور پر ہے، جنہوں نے 27، 27 ٹیسٹ میچز میں یہ ہدف حاصل کیا تھا۔
واضح رہے کہ شاہین آفریدی نے حال ہی میں اپنی بولنگ کی رفتار میں کمی سے متعلق سوالات پر کہا تھا کہ ان کی رفتار میں کمی آئی ہے، تاہم ان کے نزدیک اس وقت ٹیم کو رفتار سے زیادہ وکٹوں کی ضرورت ہے۔
شاہین آفریدی کی یہ کامیابی پاکستان کی فاسٹ بولنگ کے حوالے سے ایک اہم سنگِ میل قرار دی جا رہی ہے۔