سابق بھارتی ہائی کمشنر نے پاک فضائیہ کے آپریشن سوئفٹ ریٹارٹ کو بھی بھونڈے طریقے سے مودی کی کامیابی قرار دے دیا۔
انتخابات قریب آتے ہی مودی سرکار کی سستی شہرت کے ہتھکنڈوں میں اضافہ ہو رہا ہے۔ حیران کن طور پر اجے بساریہ کئی سال خاموش رہنے کے بعد اچانک نمودار ہو کر مودی پروپیگنڈا کا آلہ کار بن گیا۔
اجے بساریہ نے دعویٰ کیا کہ ابھینندن کی پاکستان میں گرفتاری کے بعد مودی سرکار نے پاکستان پر 9 میزائل داغنے کا فیصلہ کر لیا تھا اور مودی نے پاکستانی وزیراعظم کی بارہا کی گئی کالوں کا کوئی جواب نہیں دیا تھا۔
دوسری جانب تجزیہ کاروں کا کہنا ہے کہ مودی کے اس نئے پروپیگنڈے کا مقصد آنے والے انتخابات ہیں۔ حالیہ ڈرامے اور رام مندر کی بڑے پیمانے پر افتتاحی تقریب کا مقصد بھی انتخابات سے قبل مذہبی اور پاکستان مخالف جذبات کو ابھار کر ووٹ حاصل کرنا ہے۔
اسی طرح دفاعی ماہرین نے بھی مودی سرکار کے مضحکہ خیز بیان پر کہا کہ جس فوج نے دن دیہاڑے بھارت میں گھس کر اسکے دو جہاز مار گرائے ہوں اس بھارت کا یہ دعویٰ کرنا کہ پاکستان نے ڈر کے مارے ابھینندن کو رہائی کیا تھا ایک لطیفے سے زیادہ کچھ نہیں۔
دفاعی ماہرین نے پاکستان کے رویے کی تعریف کرتے ہوئے کہا کہ پاکستان نے انتہائی ذمہ داری کا مظاہرہ کرتے ہوئے جنگ کے پھیلاؤ کو روکنے کے لیے بھارتی قیدی کو رہا کیا تھا۔
دفاعی ماہرین نے مزید کہا کہ بھارت کے رات کی تاریکی میں حملے کا پاکستان نے دن کی روشنی میں جواب دیا، بھارت نے کھلے علاقے میں بم گرائے لیکن دعویٰ دہشتگردوں کے کیمپ پر اسٹرائیک کا کیا۔
دفاعی ماہرین نے اعتراف کیا کہ بھارتی حملے کے برعکس پاکستان کا جواب کرارا، نپا تلا اور دعوےٰ کے عین مطابق تھا۔
یاد رہے کہ مودی سرکار ماضی میں بھی ایسے کئی جھوٹے دعوے کر چکی ہے جن کو عالمی میڈیا اور ماہرین بے نقاب کر چکے ہیں۔
قبل ازیں بھارت نے پاکستان پر ایک حملے میں 300 دہشتگردوں کے ہلاک ہونے کا دعویٰ کیا لیکن الجزیرہ کی رپورٹ نے بھارتی بم کھلی جگہ پر گرنے کا انکشاف کرکے اسے جھوٹ ثابت کردیا تھا۔
اسی طرح پاک فضائیہ کے بھارت پر آپریشن سوئفٹ ریٹارٹ کے بعد بھارت نے پاکستانی ایف سولہ مار گرانے کا جھوٹا دعویٰ کیا تھا جسے پینٹاگون، کرسٹین فیئر اور کئی بھارتی دفاعی تجزیہ نگاروں نے بھی جھوٹا ثابت کیا تھا۔
قبل ازیں مقبوضہ کشمیر کے سابق گورنر ستیا پال ملک، کانگریس رہنما راہول گاندھی اور کئی دیگر رہنما اور صحافی پلوامہ حملے کے جعلی ہونے کا انکشاف کر چکے ہیں۔
اسی طرح پرشانت بھوشن، ممتا بنرجی اور رویش کمار بھی پلوامہ ڈرامے کا الزام مودی سرکار پر لگا چکے ہیں۔