مغربی افریقی ملک لائبیریا میں حادثے کے شکار آئل ٹینکر سے ایندھن اکٹھا کرنے کی لالچ میں 40 افراد ہلاک ہوگئے۔
برطانوی نشریاتی ادارے بی بی سی کے مطابق یہ افسوس ناک واقعہ دارالحکومت منروویا سے تقریباً 130 کلومیٹر دور قصبے ٹوٹوٹا میں پیش آیا جہاں سڑک کے کنارے ایندھن سے بھرا ٹینکر پہلے اُلٹا، پھر دھماکا ہوا اور آگ لگ گئی۔
عینی شاہدین کا کہنا ہے کہ جیسے ہی ایندھن سے بھرے ٹینکر کو حادثہ پیش آیا، مقامی لوگ ٹینکر سے ایندھن جمع کرنے کے لیے جائے وقوعہ پہنچنے اور پھر فوراً دھماکے کے بعد آگ بھڑک اٹھی۔
ویڈیو فوٹیج میں دیکھا گیا کہ ٹینکر کے الٹنے کے بعد بچوں سمیت بڑی تعداد میں لوگ اس کے ارد گرد بالٹیاں اور برتن لیے جمع ہو گئے تھے۔
لائبیریا کے چیف میڈیکل آفیسر کا کہنا ہے کہ دھماکے سے 40 سے زائد افراد کے جھلس کر ہلاک ہونے کی تصدیق ہوچکی ہے جبکہ کم از کم 83 زخمیوں کو اسپتال منتقل کیا جاچکا ہے۔
لائبیریا کے صدر نے مرنے والوں کے اہل خانہ سے تعزیت کا اظہار کیا ہے۔