سیئول: جنوبی کوریا کے جزیرے جیجو سے طاقت ور سمندری طوفان ’’ہنّام نور‘‘ ٹکرا گیا جس کے نتیجے میں مختلف حادثات میں مجموعی طور پر 10 افراد ہلاک اور 100 سے زائد زخمی ہوگئے۔
عالمی خبر رساں ادارے کے مطابق جنوبی کوریا میں سمندری طوفان نے بڑے پیمانے پر تباہی مچادی۔ پانی کا ریلہ قریبی رہائشی علاقے میں داخل ہوگیا۔ ایک اپارٹمنٹ کی پارکنگ پانی سے بھر گئی جس میں سے7 لاشیں ملیں جبکہ 2 افراد کو بچایا گیا۔
یہ افراد پانی کے ریلے میں اس وقت پھنس گئے جب اپنی گاڑیاں محفوظ مقام پر منتقل کرنے کے لیے پارکنگ میں آئے تھے تاہم پانی اتنی تیزی سے زیر زمین پارکنگ میں آیا کہ انھیں نکلنے کا موقع نہیں مل سکا۔
امدادی کاموں کے دوران مجموعی طور پر 10 لاشیں ملی ہیں جب کہ 100 زائد افراد زخمی ہوئے ہیں۔ زخمیوں کو اسپتال منتقل کردیا گیا ہے جب کہ متاثرہ علاقے سے شہریوں کی محفوظ مقامات پر منتقل کردیا گیا۔
ریسکیو ٹیم کے ترجمان کا کہنا ہے کہ درجنوں افراد لاپتہ ہیں جن کی تلاش کا کام جاری ہے۔ لینڈ سلائیڈنگ کے باعث کئی عمارتیں منہدم ہوگئیں جن میں رہائشیوں کے دب جانے کا بھی خدشہ ہے۔