اسلام آباد: وزیراعظم کے مشیر مفتاح اسماعیل نے وفاقی وزیر خزانہ کے عہدے کا حلف اٹھالیا۔
وزیراعظم کے مشیر مفتاح اسماعیل کی تقریب حلف برداری ایوان صدر اسلام آباد میں ہوئی، صدر مملکت ممنون حسین نے مفتاح اسماعیل سے حلف لیا، اس موقع پر وفاقی وزرا، سیاسی رہنما اور دیگر اہم شخصیات بھی موجود تھیں۔ حکومت کی جانب سے جاری کردہ نوٹی فکیشن کے تحت مفتاح اسماعیل کو وزیر خزانہ، ریونیو اور اقتصادی امور لگائے جانے کا نوٹی فکیشن جاری کردیا گیا ہے۔
واضح رہے کہ آئین کے آرٹیکل 91 کی شق 9 کے تحت کسی بھی شخص کو چھ ماہ کے لئے وزیر بنایا جاسکتاہے، مذکورہ شخص قومی اسمبلی کا رکن منتخب نہ ہو سکے تو چھ ماہ بعد وزارت سے فارغ ہو جائے گا، ممبر اسمبلی منتخب نہ ہونے والا شخص اس اسمبلی کی تحلیل تک دوبارہ وزیر نہیں بن سکتا۔