تنازعات سے تنگ آکر رجب بٹ نے ملک چھوڑ دیا

معروف یوٹیوبر رجب بٹ، جو حالیہ تنازعات کی زد میں تھے، نے اپنے تازہ ولاگ میں پاکستان چھوڑنے کی تصدیق کر دی۔

اپنے ویڈیو پیغام میں رجب بٹ نے بتایا کہ وہ توہین مذہب کے الزامات کے بعد شدید دباؤ کا شکار تھے۔ یہ تنازعہ اس وقت شدت اختیار کر گیا جب انہوں نے اپنے برانڈ کا ایک متنازع پرفیوم لانچ کیا۔ اگرچہ انہوں نے مکہ مکرمہ میں خانہ کعبہ کے سامنے معافی بھی مانگی، لیکن ان کی مشکلات کم نہ ہو سکیں۔

رجب بٹ نے کہا کہ وہ 23 مارچ کی رات پاکستان چھوڑ کر بیرون ملک چلے گئے۔ ان کا کہنا تھا کہ انہیں اپنی جان کی کوئی پرواہ نہیں، لیکن وہ اپنے اہل خانہ، خاص طور پر والدہ کی حفاظت کے لیے پریشان تھے۔

انہوں نے کہا:
"میں سب کچھ کھو سکتا ہوں، لیکن اپنے والدین کو کسی مشکل میں نہیں ڈال سکتا۔"

انہوں نے عوام سے اپیل کی کہ وہ انہیں معاف کر دیں اور کہا کہ اگر ان کی پریشانیوں کی وجہ سے ان کے والدین کو کچھ ہوا تو وہ خود کو کبھی معاف نہیں کر پائیں گے۔

ان کے ولاگ کے بعد مداحوں نے بھرپور ہمدردی کا اظہار کیا اور انہیں مشورہ دیا کہ وہ فی الحال پاکستان واپس نہ آئیں، کیونکہ موجودہ حالات میں ان کے لیے وطن محفوظ نہیں ہے۔