خیبر پختونخوا کے ضلع باجوڑ میں گزشتہ روز جنسی زیادتی کے بعد گلا دبا کر قتل کی جانے والی 5 سالہ بچی ماریہ بی بی قتل کیس کا ملزم گرفتار کرلیا گیا۔
پوسٹ مارٹم رپورٹ کے مطابق ملزم نے زیادتی کے بعد بچی کا گلا دباکر قتل کیا تھا۔
ڈسٹرکٹ پولیس آفیسر باجوڑ (ڈی پی او) وقاص رفیق نے پریس کانفرنس میں بتایا کہ بچی کے منہ پر ہاتھ رکھ کر سانس بند کرکے قتل کیا گیا۔
انہوں نے بتایا کہ ملزم نے قتل ڈر کیوجہ سے کیا، باجوڑپولیس نے واقعہ کے 12 گھنٹے بعد ملزم کو گرفتار کرلیا۔
ڈی پی او باجوڑ نے کہا کہ 16 سالہ ملزم بلال ولد حبیب الرحمن کا تعلق اسی علاقے سے ہے، ملزم نے اعتراف جرم کرلیا۔
انہوں نے کہا کہ گزشتہ روز تحصیل ماموند کے علاقہ مینہ میں پانچ سالہ بچی ماریہ بی بی کو زیادتی کے بعد گلا دبا کربے دردی سے قتل کیا گیا تھا۔
پولیس افسر نے کہا کہ واقعہ کے بعد باجوڑ میں سخت غم وغصہ پایا گیا، ۔خصوصی ٹیمیں تشکیل دیکر تفتیش کے بعد ملزم تک پہنچ گئے۔
ان کا کہنا تھا کہ مختلف لوگوں سے تفتیش کی، ملزم بلال ولد حبیب الرحمن کو شک کی بنیاد پر پکڑا گیا اور مزید تفتیش کی گئی، بچی کو سموسے کا لالچ دے کر اس کے ساتھ جنسی زیادتی کی بعد میں اس کو قتل کردیا گیا۔
ڈی پی او باجوڑ نے کہا کہ ملزم کے موبائل میں فحش ویڈیوز بھی تھیں، شواہد کو فرانزک ٹیسٹ کے لیے بھیج دیا ہے۔