اگر آپ ہر ایک یا 2 سال بعد نیا اسمارٹ فون خرید لیتے ہیں تو پرانے فون کا کیا کرتے ہیں؟
زیادہ تر افراد تو پرانے فونز کو فروخت کردیتے ہیں یا کسی دراز میں رکھ کر بھول جاتے ہیں۔
مگر پرانے فونز کو متعدد مقاصد کے لیے استعمال کیا جاسکتا ہے۔
اسمارٹ فونز کسی طاقتور کمپیوٹر سے کم نہیں ہوتے جن میں اسٹوریج اسپیس اور کیمرے جیسے فیچرز موجود ہیں، جس کے باعث وہ متعدد الیکٹرونک مصنوعات کا متبادل ثابت ہوسکتے ہیں۔
ویب کیم میں تبدیل کردیں
پرانے اسمارٹ فون کو ویب کیم میں تبدیل کرکے مختلف ایپس جیسے زوم یا اسکائپ کے لیے استعمال کیا جاسکتا ہے، جس سے ویڈیو چیٹ کوالٹی بہتر ہوجاتی ہے۔
پرانے فون کا مین کیمرا لیپ ٹاپ کے کیمرے سے بہت زیادہ بہتر کام کرتا ہے۔
الارم کے طور پر استعمال کریں
آپ اپنے پرانے اسمارٹ فون کو کسی ایپ کی مدد سے الارم کلاک کے طور پر بھی استعمال کر سکتے ہیں۔
ایسی متعدد ایس موجود ہیں جو مختلف گانوں یا دیگر کو الارم کے طور پر استعمال کرتی ہیں۔
اس فون کو آپ بستر کے سرہانے چھوڑ دیں اور کبھی کبھار چارج کرلیں تاکہ وہ کام کرتے رہیں۔
تصاویر محفوظ کریں
زیادہ تر اسمارٹ فونز کی اسٹوریج تصاویر اور ویڈیوز سے بھرجاتی ہے اور اس مسئلے سے بچنے کے لیے پرانا فون مددگار ثابت ہوسکتا ہے۔
یعنی نئے فون سے تصاویر لیں اور ان کو پرانے فون میں منتقل کردیں۔
کیمرے کے طور پر استعمال کریں
آپ پرانے فون کو ایک کیمرے کے طور پر بھی استعمال کرسکتے ہیں اور ایسے مقامات پر لے جاسکتے ہیں جہاں نئے فون کو لے جانا نہیں چاہتے۔
جیسے سمندر یا کسی جھیل پر جارہے ہیں تو یہ ڈر محسوس نہیں ہوگا کہ فون پانی میں نہ گرجائے۔
ای ریڈر بھی بنا سکتے ہیں
کسی ریڈنگ (reading) ایپ کو ڈاؤن لوڈ کرکے آپ اپنے پرانے فون کو ای ریڈر کے طور پر استعمال کر سکتے ہیں۔
یونیورسل ریموٹ بنادیں
ایک ایسا ریموٹ جو بہت کچھ کرسکے آپ کو بہت پسند آئے گا۔
تو متعدد ڈیوائسز کو کنٹرول کرنے کے لیے پرانے اسمارٹ فون کو ریموٹ میں تبدیل کیا جاسکتا ہے جس کے لیے کسی ریموٹ کنٹرول ایپ کو انسٹال کرنا ہوگا۔
گوگل ہوم میں تبدیل کریں
جی ہاں آپ اپنے پرانے اینڈرائیڈ فون کو گوگل ہوم اسمارٹ اسپیکر میں بھی بدل سکتے ہیں جس کے لیے کسی ایپ کو ڈاؤن لوڈ کرنے کی بھی ضرورت نہیں۔
بس فون کو نئے اینڈرائیڈ آپریٹنگ سسٹم پر اپ ڈیٹ کرنے اور ایک بلیوٹوتھ اسپیکر کی ضرورت ہوگی، دونوں ڈیوائسز کو اکٹھے پلگ ان رکھیں اور بس گوگل کمانڈ کے ذریعے ڈیوائسز کو کنٹرول کریں۔
گاڑی تلاش کریں
اپنے پرانے اسمارٹ فون کو گاڑی میں چھپا کر (اس کی چارجنگ کو یقینی بنانا ہوگا) کر آپ اسے کسی ایمرجنسی کی صورت میں استعمال کر سکتے ہیں۔
اس کے ساتھ ساتھ آپ اسے اپنی گاڑی کو ٹریک کرنے کے لیے اس وقت استعمال کرسکتے ہیں جب وہ چوری ہو جائے۔
سکیورٹی کیمرے کی شکل بھی دے سکتے ہیں
اس مقصد کے لیے کسی سکیورٹی کیمرا ایپ جیسے Alfred کو ڈاؤن لوڈ کرنا ہوگا، جس کے بعد فون کو اس جگہ رکھیں جس پر نظر رکھنا چاہتے ہیں۔
وائرلیس ماؤس بنادیں
اگر لیپ ٹاپ یا کمپیوٹر کا وائرلیس ماؤس کسی وجہ سے خراب ہوجائے تو پرانے اسمارٹ فون کو اس کے بیک اپ کے طور پر استعمال کرسکتے ہیں۔
اس کے لیے کسی ایپ جیسے ریموٹ ماؤس کو ڈاؤن لوڈ کرنا ہوگا اور پھر فون اور کمپیوٹر کو ایک ہی وائی فائی نیٹ ورک پر کنکٹ کرنا ہوگا اور بس۔
میوزک پلیئر کے طور پر استعمال کریں
پرانے فون کو میڈیا پلیئر کے طور پر بھی استعمال کرسکتے ہیں، بس پرانا ڈیٹا ڈیلیٹ کرکے میوزک اور میوزک ایپس کو برقرار رکھیں، جس کے بعد اس میں متعدد گانے محفوظ کیے جاسکتے ہیں۔