وفاقی وزیر اطلاعات عطا تارڑ کا کہنا ہے کہ علی امین گنڈا پورکا بیان ناکامی کا اعتراف ہے۔
وزیر اعلیٰ کے پی کے، کے بیان پر ردعمل دیتے ہوئے انہوں نے کہا کہ علی امین گنڈا پور خیبرپختونخوا حکومت چلانے کے قابل نہیں۔اسلام آباد اور پنجاب پر لشکرکشی کی دھمکی 9 مئی دوہرانے کا اعلان ہے۔
علی امین گنڈا پور اپنا نقصان کریں گے کسی اور کا نہیں ،ان کا کوئی بیان، اقدام اور رویہ جمہوری، سیاسی اور پارلیمانی نہیں ،انہوں نے کبھی نہیں کہا تعلیم، صحت، روزگار کیلئے مقابلہ کریں گے۔
انقلاب لانا ہے تو صحت، تعلیم اور عوامی فلاح بہبود کے منصوبوں کا لائیں،خیبرپختونخوا میں کرپشن اور نا اہلی کی انتہا ہو چکی ،مقابلہ ہوتا اگر خیبرپختونخوا حکومت بجلی صارفین کو کوئی ریلیف دیتی۔
مقابلہ ہوتا اگراسپتال، درس گاہوں کی تعمیر سے عوام کی خدمت کا کوئی ریکارڈ بناتے ،پی ٹی آئی کو تکلیف ہے کہ پاکستان معاشی بحالی کی راہ پر کیوں چل پڑا ہے ،ان کو تکلیف ہے مہنگائی 32 فیصد سے 9.6 فیصد پر کیوں آگئی ہے۔