جنوبی کوریا میں مسجد کی تعمیر کیلئے چندہ اکٹھا کرنے پر معروف نوجوان کورین یوٹیوبر مشکل میں پڑ گیا۔
غیرملکی میڈیا رپورٹس کے مطابق 2019 میں اسلام قبول کرنے والے داؤد کیم پر جنوبی کوریا میں الزام عائد کیا جا رہا ہے کہ وہ مسجد تعمیر کرنے کیلئے چندے کے نام پر مسلمانوں سے دھوکہ دہی کے ذریعے پیسے بٹور رہا ہے۔
اس حوالے سے کورین مسلمان یوٹیوبر کا مساجد کی تعمیر کیلئے چندہ نجی اکاؤنٹس میں اکٹھا کرنے کے اسکینڈل نے ہنگامہ کھڑا کر دیا ہے۔کورین مسلم داؤد کیم یوٹیوب پر 5ملین اور انسٹا گرام پر 3ملین سے زیادہ فالوورز کے ساتھ غیر کوریائی مسلمانوں میں خاصا مقبول ہے۔
داؤد کیم کا حال ہی میں جنوبی کوریا میں سرکاری اسلامی حکام کے ساتھ اس بات پر تنازع کھڑا ہو گیا کہ وہ ڈایگو شہر میں ایک مسجد کی تعمیر کے منصوبے کی مالی اعانت کیلئے اپنے فالوورز سے چندہ اکٹھاکر رہے ہیں۔
مسجد کی تعمیر کے امکان پر حکام اور علاقے کے رہائشیوں کے درمیان چار سال سے تنازع چل رہا ہے، اس دوران داؤد کیم کو اپنے یوٹیوب چینل کیلئے مواد ملتا رہا، حکومت کی طرف سے تعمیراتی عمل کو درست قرار دیے جانے کے باوجود علاقے کے مکینوں نے اس کی شدید مخالفت کی۔
داؤد کیم نے 5ماہ قبل اپنے یوٹیوب چینل پر ویڈیو پوسٹ کرتے ہوئے اپنے غیر ملکی فالوورز سے عطیات جمع کرانے کیلئے کہا اور اپنا پے پال کا ذاتی اکاؤنٹ بھی شیئر کیا، داؤد نے یوٹیوب ویڈیو میں کہا کہ اگر آپ کوریا میں اسلام کی مدد کرنا چاہتے ہیں تو براہ کرم چندہ دیں۔
یوٹیوبر داؤد کیم نے ایک سال قبل بھی ویڈیو پوسٹ کی جس میں اعلان کیا گیا تھا کہ اس کے پاس جنوبی کوریا میں مساجد کی تعمیر کے دو منصوبے ہیں، پہلا ڈیگو میں اور دوسرا دارالحکومت سیؤل میں، انہوں نے کہا کہ وہ اپنے مداحوں سے بطور عطیات 50ہزار ڈالر اکٹھا کر چکے اور ان عطیات کی وجہ سے وہ ڈیگو مسجد کی تعمیر کا عمل دوبارہ شروع کرنے میں کامیاب ہوئے۔
داؤد کیم کی جانب سے ویڈیو جاری ہونے کے بعد کوریا میں سرکاری اسلامی تنظیم کے این یو نے وضاحتی ویڈیو جاری کرتے ہوئے کہا کہ یوٹیوبر داؤد کیم نے مسجد کیلئے جمع ہونے والی رقم کو عطیہ نہیں کیا، اس نے 2022 میں صرف ایک بار 2ہزار امریکی ڈالر بطور عطیہ دیئے، جس کے بعد داؤد کیم سے پوچھا جانے لگا کہ 2ہزار جمع کرانے کے بعد باقی عطیہ کردہ رقم کہاں گئی؟
کورین اسلامک یونین نے بھی سوشل میڈیا پر وضاحتی بیان میں کہا کہ ہماری تنظیم جنوبی کوریا کی حکومت کے ساتھ رجسٹرڈ واحد باضابطہ اسلامی ادارہ ہے اور ملک میں مساجد کی تعمیر اور ان کیلئے فنڈز اکٹھا کرنے کا مجاز ہے، داؤد کیم کو جنوبی کوریا میں مسجد بنانے کا کوئی قانونی اختیار نہیں ہے۔ داؤد کیم کے ملک میں مسجد کی تعمیر کے دعوؤں کا یونین سے کوئی تعلق نہیں ہے۔