رنویر سنگھ اور عالیہ بھٹ کی میوزیکل فلم ’بیجو باؤرا‘ بننے میں بڑی رکاوٹ آگئی

 ممبئی: بالی وڈ کے نامور ڈائریکٹر سنجے لیلا بھنسالی کئی برسوں سے میوزیکل فلم ’بیجو باؤرا‘ پر کام کررہے ہیں جبکہ اس پروجیکٹ پر متعدد نشیب و فراز آئے ہیں۔ 

بھنسالی نے کورونا وبا سے قبل میوزیکل فلم کا اعلان کیا تھا اور اس کے مرکزی کرداروں کیلئے رنویر سنگھ اور عالیہ بھٹ کو فائنل کرلیا جبکہ فلم میں ڈکیٹ کے کردار کیلئے ان کی دیپیکا پڈوکون، کیارا ایڈوانی اور نین تارہ سے گفتگو ہوتی رہی ہے۔

بھارتی میڈیا نے دعویٰ کیا ہے کہ ڈائریکٹر نے میگا فلم کیلئے 350 کروڑ کا بجٹ رکھا ہے اور فلم کی تکمیل میں یہی سب سے بڑی رکاوٹ بن گیا ہے۔

ذرائع کے مطابق سنجے بھنسالی نے متعدد اسٹوڈیوز سے رابطہ کیا ہے لیکن وہ ایک میوزیکل فلم پر اتنی بڑی سرمایہ کاری کرنے کیلئے تیار نہیں ہیں۔

کچھ اسٹوڈیوز نے ڈائریکٹر کو فلم کا بجٹ کم کرنے کا مشورہ دیا ہے لیکن سنجے بھنسالی بجٹ کو کم کرنے کے موڈ میں نہیں ہیں۔

’بیجو باؤرا‘ شروع نہ ہونے پر فلمساز اپنی نئی فلم ’انشااللہ‘ پر کام کررہے ہیں اور اگر شاہ رخ خان کی طرف سے گرین سگنل مل گیا تو یہ ان کی اگلی فلم ہوگی۔