عام طور پر دیکھا گیا ہے ماہ رمضان میں افطاری کے بعد ہمیں اپنی طبیعت میں بوجھل پن یا معدے میں تیزابیت کا شدت سے احساس ہوتا ہے، بعض اوقات یہ کیفیت کسی بڑی بیماری کا پیش خیمہ بن سکتی ہے۔
ایسی صورتحال میں بدہضمی، سینے کی جلن اور تیزابیت جیسی شکایت سے چھٹکارہ حاصل کرنے کے لیے چند مفید اور آزمودہ نسخوں سے مدد حاصل کی جاسکتی ہے۔
اس حوالے سے حکیم محمد امجد اسماعیل نے مذکورہ کیفیت سے بچاؤ کیلئے مفید مشورے دیئے۔
انہوں نے کہا کہ روزے کی حالت میں انسان کا معدہ دس سے بارہ گھنٹے تک خالی رہتا ہے مگر افطار کے بعد جب بندہ کچھ کھاتا ہے تو اس کے بعد سینے میں شدید جلن ، پیٹ میں درد اور شدید گیس بننا شروع ہوجاتی ہے۔
ان کا کہنا تھا کہ افطار میں پکوڑے، سموسے، پراٹھے یا دیگر تلی ہوئی اشیاء سے ہر ممکن اجتناب کرنا چاہیے، درحقیقت یہ غذائیں جو دیر تک معدے میں رہتی ہیں جو تیزاب کے ساتھ مل کر معدے کی جلن ، تیزابیت اور گیس کا سبب بنتی ہیں۔
حکیم محمد امجد اسماعیل نے بتایا کہ اس سب سے آسان حل یہ کہ آپ کھجور اور پانی سے روزہ افطار کریں اور پیاس بجھانے کیلئے کوئی بھی لال شربت آدھا گلاس لے لیں اور مغرب کی نماز کے بعد وہ رات کا کھانا جو روز کھاتے ہیں وہی کھائیں تو یہ شکایت دور ہوجائے گی۔