موٹاپا جسم میں چربی کے زیادہ ہو جانے سے جنم لینے والی ایک پیچیدہ بیماری ہے، موٹاپا محض جسمانی خوبصورتی کا مسئلہ ہی نہیں بلکہ ایک ایسا طبّی طور پر توجہ طلب مسئلہ ہے جو نظر انداز کئے جانے کی وجہ سے کئی اور جسمانی تکالیف اور بیماریوں کا باعث بن سکتا ہے۔
موٹاپا کم کرنے کے طریقے جاننا ہر اس شخص کے لیے ایک لازمی ہے جو اپنی صحت کو مثالی بنانا چاہتا ہو اور اپنی کسی لا پرواہی کی وجہ سے بیمار پڑنے سے بچنا چاہتا ہو۔
وزن میں اضافہ تو کسی بھی انسان کو پسند نہیں ہوتا بالخصوص اگر پیٹ باہر نکلنا شروع ہوجائے اور وزن میں کمی کے لیے لوگ ڈائٹنگ کرتے ہیں، ورزشوں کے پروگرام کا حصہ بنتے ہیں یا ایسے ہی دیگر طریقوں کو اپناتے ہیں۔
ایسے ہی افراد کیلئے ایک ایسا طریقہ بھی موجود ہے جس سے جسمانی وزن میں کمی لانا ممکن ہے اور کچھ خاص کرنا بھی نہیں پڑتا۔
اور وہ ہے مناسب وقت تک نیند جس سے غذا اور ورزش کے معمولات زیادہ مؤثر ہوجاتے ہیں۔ یہ بات امریکا میں ہونے والی ایک طبی تحقیق میں سامنے آئی۔
ٹسبرگ یونیورسٹی کی اس تحقیق میں ایسے 125 بالغ افراد کو شامل کیا گیا تھا جن کا جسمانی وزن کافی زیادہ تھا یا وہ موٹاپے کے شکار تھے۔
ان افراد کو جسمانی وزن میں کمی کے ایک سالہ پروگرام کا حصہ بنایا گیا اور یہ دیکھا گیا کہ نیند کے دورانیے سے غذا اور ورزش کے معمول کو برقرار رکھنے میں کس حد تک مدد ملی۔
نتائج سے معلوم ہوا کہ زیادہ وقت تک سونے والے افراد کو غذائی کیلوریز کو محدود کرنے میں مدد ملی جبکہ وہ ورزش کو بھی اپنے معمول کا حصہ بنانے میں کامیاب ہوئے۔
محققین کو پہلے سے توقع تھی کہ نیند سے جسمانی وزن میں کمی لانے میں مدد ملے گی مگر وہ اتنا زبردست اثر دیکھ کر حیران رہ گئے۔ انہوں نے بتایا کہ نتائج سے عندیہ ملتا ہے کہ اچھی نیند سے طرز زندگی کو صحت کے لیے مفید بنانے میں بھی مدد مل سکتی ہے۔
اس سے قبل ان محققین کی ایک پرانی تحقیق میں دریافت کیا گیا تھا کہ اچھی نیند سے زیادہ جسمانی چربی گھلانے میں مدد ملتی ہے۔ اس تحقیق کے نتائج امریکن ہارٹ ایسوسی ایشن کے سالانہ اجلاس کے موقع پر پیش کیے گئے۔