حکومت کا ٹرانسپورٹرز کو کرایوں میں اضافے کی اجازت

راولپنڈی: پنجاب انتظامیہ نے شہر کے ٹرانسپورٹرز کو کرایوں میں اضافہ کی اجازت دے دی ہے، جس کے تحت پٹرول گاڑیوں کے کرایوں میں 10 فیصد اور ڈیزل گاڑیوں کے کرایوں میں 25 فیصد اضافہ کیا گیا ہے۔

چیف سیکرٹری پنجاب نے 37 فیصد اضافے کی سفارش مسترد کرتے ہوئے ٹرانسپورٹرز کو مجوزہ سے زائد کرایا وصول کرنے سے روکا ہے۔ سیکرٹری آر ٹی اے اسد عباس شیرازی نے ٹرانسپورٹرز کو نئے ہدایت نامے کے مطابق عمل درآمد کی ہدایات جاری کی ہیں، اور زائد کرایہ وصول کرنے پر قانونی کارروائی کا اعلان کیا ہے۔

نئے کرایوں کے تحت اے سی اور نان اے سی کٹیگری ختم کر دی گئی ہے، جبکہ گڈز ٹرانسپورٹرز نے حالیہ پٹرولیم مصنوعات میں اضافے کے پیش نظر کرایوں میں 70 فیصد اضافہ نافذ کرنے کا اعلان کیا ہے۔

چوہدری مقبول حسین، صدر پنجاب گڈز ٹرانسپورٹرز ایسوسی ایشن، نے کہا کہ مہنگائی، ڈیزل کی قیمتوں میں اضافہ اور آپریشنل اخراجات کے پیش نظر موجودہ کرایوں پر خدمات جاری رکھنا مشکل تھا، اس لیے 3 اپریل 2026 سے نئے کرایے نافذ کیے جائیں گے تاکہ اشیائے ضروریہ کی بروقت رسیل یقینی بنائی جا سکے۔

سیکرٹری آر ٹی اے نے کہا کہ نئے کرایوں کے نفاذ پر سخت نگرانی کی جائے گی اور کسی بھی خلاف ورزی پر قانونی کارروائی ہوگی۔