پاکستانی جوابی کارروائی سے بچنے کیلئے افغان طالبان کابل سے فرار

پاکستانی جوابی حملوں کے خدشے کے پیش نظر افغان طالبان کے متعدد عہدیدار ہیلی کاپٹروں کے ذریعے صوبہ غور منتقل ہوگئے ہیں۔

افغان میڈیا رپورٹس کے مطابق صوبہ غور کے کم از کم چار ذرائع نے بتایا ہے کہ ہفتہ کی صبح طالبان کے کئی عہدیدار چار ہیلی کاپٹروں کے ذریعے اس صوبے میں پہنچے۔ ذرائع کے مطابق یہ نقل و حرکت ممکنہ پاکستانی فضائی حملوں کے خدشے کے باعث کی گئی۔

میڈیا رپورٹس میں دعویٰ کیا گیا ہے کہ ان ہیلی کاپٹروں کے ذریعے منتقل ہونے والے افراد کا تعلق Taliban کی قیادت سے ہے۔ افغان میڈیا نے اس حوالے سے ایک ہیلی کاپٹر کی تصویر بھی جاری کی ہے جس میں طالبان عہدیداروں کی صوبہ غور آمد کو دکھایا گیا ہے۔

رپورٹس کے مطابق اس سے قبل بھی ممکنہ پاکستانی کارروائیوں کے خوف سے طالبان کے بعض عہدیدار ہیلی کاپٹروں کے ذریعے دیگر علاقوں کا رخ کر چکے ہیں۔ ذرائع کا کہنا ہے کہ کچھ عہدیدار صوبہ بامیان اور دایکندی کی جانب بھی منتقل ہوئے تھے۔

تاحال اس حوالے سے Taliban کی جانب سے کوئی باضابطہ بیان سامنے نہیں آیا۔