پاکستان تحریکِ انصاف خیبرپختونخوا کے صدر اور رکن قومی اسمبلی جنید اکبر نے پارٹی کے رویے پر شدید ناراضی کا اظہار کرتے ہوئے پارلیمانی کمیٹی سے علیحدگی کا اعلان کر دیا ہے۔ ایک مبینہ آڈیو میں جنید اکبر نے کہا کہ ان کی برداشت ختم ہو چکی ہے اور وہ اب نہ تو پارٹی کی کمیٹی کا حصہ رہیں گے اور نہ ہی کسی عہدے دار کو تسلیم کریں گے۔
جنید اکبر نے کہا کہ پارٹی میں فیصلے چند افراد روزانہ کی بنیاد پر کرتے ہیں، جبکہ دیگر اراکین کو اہم مواقع پر بولنے کا موقع نہیں دیا جاتا۔ انہوں نے شکوہ کیا کہ اہم معاملات، بجٹ اور قانون سازی میں انہیں نظر انداز کیا گیا، اور پارٹی میں شرافت اور برداشت کو کمزوری سمجھا جا رہا ہے۔
انہوں نے مزید کہا کہ دہشتگردی جیسے سنگین مسائل پر بھی سوال کرنے کی ہمت کسی میں نہیں، جبکہ معمولی معاملات پر تنقید اور مذاق ہوتا رہتا ہے۔ جنید اکبر نے اعلان کیا کہ وہ آئندہ سپیکر سے براہِ راست رابطہ کریں گے اور پارٹی کمیٹی سے علیحدہ رہیں گے، جس سے پی ٹی آئی کے اندر اختلافات اور ناراضگی واضح ہو گئی ہے۔
یہ قدم پارٹی میں موجود اختلافات اور قیادت کے حوالے سے بڑھتی ہوئی تنقید کی عکاسی کرتا ہے، اور سیاسی حلقوں میں اس پر بحث جاری ہے۔