قائمہ کمیٹیوں کی کاروائی اپوزیشن کی غیر حاضری کے باوجود جاری رکھنے کا فیصلہ

قومی اسمبلی کی قائمہ کمیٹیوں کی کارروائی میں اپوزیشن کی عدم شرکت کے بعد حکومت نے نیا لائحہ عمل طے کر لیا ہے۔ اب حکومت اور اسپیکر قومی اسمبلی اپوزیشن کی منت سماجت نہیں کریں گے اور دستیاب ارکان کے ساتھ کمیٹیوں کا کام آگے بڑھایا جائے گا۔

پارلیمانی ذرائع کے مطابق جہاں اپوزیشن کے چیئرمین موجود نہیں ہوں گے، وہاں کمیٹیوں کی صدارت عارضی سربراہ کریں گے۔ اس حکمت عملی کے تحت قانون سازی اور نگرانی کے عمل میں تعطل سے بچنے کے لیے متبادل ارکان کو بھی قائمہ کمیٹیوں میں شامل کرنے پر غور کیا جا رہا ہے۔

ذرائع نے مزید بتایا کہ اس اقدام کا مقصد پارلیمانی کارروائیوں کو متاثر کیے بغیر قائمہ کمیٹیوں کی افادیت کو برقرار رکھنا ہے، تاکہ قانون سازی اور سرکاری نگرانی کے امور وقت پر انجام پائیں۔