جاتی امرا: سابق وزیر اعظم نواز شریف نے اپنے قانونی مشیروں سے احتساب عدالتوں میں زیر سماعت مقدمات پر مشاورت کی ہے۔
جاتی امرا میں سابق وزیراعظم محمد نوازشریف سے ان کے قانونی مشیروں نے ملاقات کی ہے۔ ملاقات کرنے والوں میں خواجہ حارث، اعظم نذیر تارڑ،نصیر بھٹہ اور سابق سیکرٹری پراسیکیوشن سینیٹر رانا مقبول احمد شامل ہیں۔
ملاقات کے دوران نواز شریف کے خلاف احتساب عدالت میں زیر سماعت نیب ریفرنسز، اسلام آباد ہائی کورٹ میں ایون فیلڈ ریفرنس کے فیصلے کے خلاف اپیل کے علاوہ شہباز شریف کی گرفتاری، ان سے تفتیش اور ان کے ریمانڈ میں مزید ممکنہ توسیع نہ ہونے دینے کے لیے مشاورت کی گئی۔