محکمہ موسمیات نے 10 سے 15 اکتوبر کے دوران ملک کے بالائی اور وسطی علاقوں میں وقفے وقفے سے بارش، تیز ہواؤں اور گرج چمک کی پیشگوئی کردی، جبکہ بعض مقامات پر ژالہ باری کا بھی امکان ظاہر کیا گیا ہے۔
محکمہ موسمیات کے مطابق مغربی ہواؤں کا ایک کمزور سلسلہ ملک کے بالائی علاقوں پر اثرانداز ہوسکتا ہے، جس کے باعث اسلام آباد، راولپنڈی، پوٹھوہار اور شمالی پنجاب کے مختلف علاقوں میں موسم تبدیل ہونے کا امکان ہے۔
پنجاب میں کہاں کہاں بارش ہوگی؟
پیشگوئی کے مطابق 10، 11، 13 اور 14 اکتوبر کو پنجاب اور اسلام آباد میں بارش کا امکان ہے۔ راولپنڈی، اٹک، چکوال، جہلم، گوجرانوالہ، گجرات، سیالکوٹ، نارووال اور لاہور سمیت مختلف علاقوں میں تیز ہواؤں اور گرج چمک کے ساتھ بارش ہوسکتی ہے۔
خیبرپختونخوا، کشمیر اور گلگت بلتستان میں بھی بارش متوقع
محکمہ موسمیات کے مطابق خیبرپختونخوا کے بالائی علاقوں میں 15 اکتوبر تک بارش کا امکان ہے۔ چترال، دیر، سوات، کوہستان، شانگلہ، بٹگرام، مانسہرہ اور ایبٹ آباد میں تیز ہواؤں اور بارش سے موسم خوشگوار ہونے کی توقع ہے۔
اسی طرح کشمیر اور گلگت بلتستان کے مختلف علاقوں میں بھی بارش اور گرج چمک کا امکان ہے، جبکہ بعض مقامات پر ژالہ باری کے باعث درجہ حرارت میں کمی آسکتی ہے۔
بلوچستان میں بھی موسم بدلنے کا امکان
بلوچستان کے اضلاع ژوب، بارکھان، دکی، ہرنائی، کوہلو، لورالائی، موسیٰ خیل اور زیارت میں تیز ہواؤں اور بارش کی پیشگوئی کی گئی ہے۔ دوسری جانب سندھ کے بیشتر علاقوں میں آئندہ چند روز تک موسم گرم اور خشک رہنے کا امکان ہے۔
دریاؤں میں سیلاب کا خطرہ؟
محکمہ موسمیات کے فلڈ فورکاسٹنگ ڈویژن کے مطابق 10 سے 15 اکتوبر کے دوران بڑے دریاؤں کے بالائی آبی علاقوں میں کہیں کہیں بارش ہوسکتی ہے، تاہم 9 اکتوبر کو جاری کردہ بلیٹن میں دریاؤں کے بہاؤ معمول کے مطابق رہنے کی توقع ظاہر کی گئی تھی۔
شہریوں کیلئے اہم ہدایت
محکمہ موسمیات کی موسمی ایڈوائزری کے مطابق تیز ہواؤں، آسمانی بجلی اور ژالہ باری کے دوران کمزور عمارتوں، بجلی کے کھمبوں، بل بورڈز اور سولر پینلز کو نقصان پہنچنے کا خدشہ ہوسکتا ہے۔
شہریوں کو ہدایت کی جاتی ہے کہ خراب موسم کے دوران احتیاط برتیں، غیر ضروری سفر سے گریز کریں اور آسمانی بجلی یا تیز ہواؤں کے دوران درختوں اور کھلے مقامات سے دور رہیں۔ موسم کی تازہ صورتحال سے باخبر رہنا بھی ضروری ہے۔