لاہور بلوز نے قومی ٹی ٹوئنٹی کپ کے فائنل میں پشاور کو 9 وکٹوں سے شکست دے کر چیمپئن شپ جیت لی۔ فائنل میچ فیصل آباد کے اقبال اسٹیڈیم میں کھیلا گیا، جہاں لاہور بلوز کے کھلاڑیوں نے بیٹنگ اور بولنگ میں شاندار کارکردگی کا مظاہرہ کیا۔
پشاور کی مایوس کن بیٹنگ
ٹاس جیت کر پہلے بیٹنگ کرتے ہوئے پشاور کی ٹیم محض 110 رنز تک محدود رہی۔ ٹورنامنٹ میں تین سنچریاں بنانے والے صاحبزادہ فرحان اس بار ناکام رہے اور صرف 17 رنز بنا کر پویلین لوٹ گئے۔ کپتان افتخار احمد نے 34 اور وکٹ کیپر ذوالکفل نے 32 رنز بنا کر ٹیم کو سنبھالنے کی کوشش کی، لیکن لاہور بلوز کے بولرز نے عمدہ کارکردگی دکھاتے ہوئے پشاور کو بڑا اسکور کرنے سے روک دیا۔ محمد سلمان مرزا نے 21 رنز دے کر 4 وکٹیں حاصل کیں، جبکہ محمد عرفان نے 2 کھلاڑیوں کو آؤٹ کیا۔
لاہور بلوز کی شاندار بیٹنگ
111 رنز کے تعاقب میں لاہور بلوز کے بیٹرز نے بہترین کھیل کا مظاہرہ کیا۔ عمر صدیق نے 64 رنز کی ناقابلِ شکست اننگز کھیلی، جبکہ جنید علی نے 30 رنز بنا کر ٹیم کی فتح میں اہم کردار ادا کیا۔ لاہور بلوز نے ہدف 16 اوورز میں ہی حاصل کر لیا۔
ایوارڈز اور اعزازات
-
پلیئر آف دی میچ: محمد سلمان مرزا (4 وکٹیں)
-
پلیئر آف دی ٹورنامنٹ: صاحبزادہ فرحان (605 رنز، 121 کی اوسط)
-
بہترین بیٹر: صاحبزادہ فرحان
-
بہترین بولر: حسن علی (13 وکٹیں)
-
بہترین وکٹ کیپر: محمد اخلاق (114 رنز، 4 کیچز، 2 اسٹمپڈ)
لاہور بلوز نے سیمی فائنل میں ملتان کو 5 رنز سے شکست دے کر فائنل میں جگہ بنائی تھی، جبکہ پشاور نے اپنے سیمی فائنل میں راولپنڈی کو ہرایا تھا۔