زائرین کیلئے مسجد الحرام کا بڑا حصہ کھول دیا گیا

مسجد الحرام کی تیسری توسیع کا بڑا حصہ نمازیوں کے لیے کھول دیا گیا ہے، جہاں رمضان المبارک میں فرض نمازوں اور تراویح کی ادائیگی کی جا سکے گی۔

ادارہ امور حرمین کے مطابق اس توسیع کا مجموعی رقبہ 12 لاکھ 14 ہزار مربع میٹر پر مشتمل ہے، جس میں گراؤنڈ فلور، پہلی منزل، میزنائن، دوسری منزل، دوسری منزل میزنائن اور چھت شامل ہیں۔

توسیع شدہ حصے میں 25 ہزار قالین بچھائے گئے ہیں، جبکہ 17 ہزار واٹر کولرز رکھے گئے ہیں۔ اس کے علاوہ وضو اور نماز کے لیے 11 ہزار 436 مقامات تیار کیے گئے ہیں، جبکہ 80 دروازے اور 28 لفٹیں بھی نصب کی گئی ہیں۔

واضح رہے کہ اس تاریخی توسیع کا حکم شاہ عبداللہ بن عبدالعزیز نے دیا تھا، جس کا آغاز جون 2010 میں ہوا، اور یہ مسجد الحرام کی سب سے بڑی توسیع سمجھی جاتی ہے۔