پاکستان کے خلاف پہلے ٹیسٹ میچ کے تیسرے دن بنگلہ دیش کی بیٹنگ جاری ہے، پاکستان کو 249 رنز کی برتری حاصل ہے۔
راولپنڈی کرکٹ اسٹیڈیم میں جاری ٹیسٹ میچ میں بنگلہ دیش کی ٹیم نے 4 وکٹوں کے نقصان پر 199 رنز بنا رکھے ہیں۔ بنگلہ دیش کی طرف سے شادمان اسلام نے 93 رنز اور مومن الحق نے 50 رنز کی اننگز کھیل کر ٹیم کو سہارا دیا۔
بنگلادیش کے نجم الحسین شنٹو 16 رنز اور ذاکر حسن 12 رنز بناکر پویلین لوٹے۔ دوسرے سیشن کے اختتام پر مشفق الرحیم اور شکیب الحسن کریز پر موجود ہیں۔
پاکستان کی طرف سے خرم شہزاد نے 2 جبکہ محمد علی اور نسیم شاہ نے 1,1 وکٹ حاصل کی۔
خیال رہے کہ راولپنڈی ٹیسٹ کے دوسرے دن کے اختتام پر پاکستان نے بنگلادیش کے خلاف پہلی اننگز 448 رنز پر ڈکلیئر کردی تھی۔ محمد رضوان 171 رنز بنا کر ناقابلِ شکست رہے جبکہ سعود شکیل نے 141 رنز کی عمدہ اننگز کھیلی۔