: بالی ووڈ اداکارہ ملائیکہ اروڑہ کا کہنا ہے کہ میں سچی محبت کے لیے آخرحد تک لڑتی رہوں گی۔
بھارتی میڈیا رپورٹس کے مطابق ڈانسر و اداکارہ ملائکہ اروڑہ اور ان کے دیرینہ بوائے فرینڈ اداکار ارجن کپور کی علیحدگی کی خبریں گزشتہ چند ہفتوں سے زور پکڑ رہی ہیں۔
حال ہی میں ارجن کپور کی 39 ویں سالگرہ کے موقع پر ان کی رہائش گاہ پر رات گئے پارٹی کا اہتمام کیا گیا تھا جس میں ان کے قریبی دوستوں نے شرکت کی تھی لیکن ان کی گرل فرینڈ ملائیکہ اروڑہ اس پارٹی سے غائب تھیں۔
سالگرہ کی پارٹی میں ملائیکہ اروڑہ کی عدم موجودگی نے اس جوڑے کی علیحدگی سے متعلق گردشی خبروں میں جیسے آگ کا کام کیا ہے۔
اب گزشتہ شب بھارتی میڈیا کو انٹرویو دیتے ہوئے اداکارہ نے ایک سوال کے جواب میں محبت کے بارے میں اپنا خیالات کا اظہار کیا۔
انہوں نے کہا کہ چاہے کچھ بھی ہو جائے میں سچی محبت سے کبھی دستبردار نہیں ہوں گی، میں ایک سکارپین ہوں، اس لیے اپنی محبت کیلئے آخری دم تک لڑتی رہوں گی لیکن اس کے ساتھ ہی میں ایک حقیقت پسند انسان بھی ہوں اور جانتی ہوں کہ مجھے کس حد تک جانا ہے۔
خیال رہے کہ حال ہی میں اداکار ارجن کپور نے اپنی 39ویں سالگرہ منائی ہے، لیکن اس موقع پر ملائیکہ اروڑہ نے انہیں سالگرہ کی مبارک باد دینے کی بجائے سوشل میڈیا پر مبہم پوسٹ شیئر کی تھی جس کے بعد ان کی علیحدگی کی خبریں مزید طول پکڑ گئیں ہیں۔
واضح رہے علیحدگی سے متعلق گردشی خبروں پر ملائیکہ اروڑہ اور ارجن کپور دونوں ہی خاموش ہیں، کسی نے اس حوالے سے کوئی تصدیق نہیں کی ہے۔