پاکستان سُپر لیگ (پی ایس ایل) 9 کے میڈیا رائٹس کی نیلامی میں بے ضابطگیاں، عدالت نے چیئرمین پاکستان کرکٹ بورڈ (پی سی بی) محسن نقوی کو نوٹس جاری کردیا۔
لاہور ہائیکورٹ میں آج پی ایس ایل 9 کے میڈیا رائٹس کی نیلامی سے متعلق کیس کی سماعت ہوئی۔ درخواست پی ٹی وی ورکر یونین نے رانا انتظار حسین ایڈووکیٹ کی وساطت سے دائر کی۔
درخواست گزار نے مؤقف اپنایا کہ پی ایس ایل میڈیا رائٹس کی مالیت سات 7 ارب 35 کروڑ روپے تھی۔ رائٹس کو غیر قانونی طور پر 6 ارب 30 کروڑ روپے میں نیلام کر دیا گیا۔
درخواست گزار کی طرف سے استدعا کی گئی کہ عدالت پی ایس ایل میں بے ضابطگیوں کا نوٹس لے۔ عدالت نے چیئرمین پی سی بی اور دیگر فریقین کو نوٹسز جاری کرکے جواب بھی طلب کر لیا۔
خیال رہے کہ سرکاری ٹی وی پی ٹی وی اسپورٹس پر پی ایس ایل کا رواں سیزن نشر نہیں کیا جارہا ہے۔