نگراں وزیر داخلہ سینیٹر سرفراز بگٹی نے کہا ہے کہ پاکستان تحریک انصاف (پی ٹی آئی) کو تھریٹ نہیں، مولانا فضل الرحمان کو سیکیورٹی تھریٹس ہیں۔
نجی ٹی وی سے گفتگو کرتے ہوئے سرفراز بگٹی نے کہا کہ عام انتخابات کرانا الیکشن کمیشن کی ذمے داری ہے، ہم شفاف انتخابات کےلیے ہر طرح کی سیکیورٹی فراہم کریں گے۔ سیکیورٹی تھریٹس ہیں لیکن ہم ہمیشہ کی طرح چیلنجز سے نمٹ لیں گے۔
نگراں وزیر داخلہ نے مزید کہا کہ ہمارے لیے تمام لوگ قابل عزت ہیں، سب اپنی الیکشن مہم چلائیں، پی ٹی آئی کو تھریٹ نہیں، مولانا فضل الرحمان کو سیکیورٹی تھریٹس ہیں۔
اُن کا کہنا تھا کہ ہماری پوزیشن نیوٹرل ہے، ہمارے لیے سب برابر ہیں، ہماری منسٹری سے میاں صاحب کو کوئی ریلیف نہیں ملا۔
سرفراز بگٹی نے یہ بھی کہا کہ چیئرمین پی ٹی آئی کا معاملہ عدالتوں میں ہے، زیر التوا معاملے پر بات کرنا مناسب نہیں۔
انہوں نے کہا کہ تاریخ میں ایسا نہیں ہوا کہ ملزم کو گرفتار کیا گیا اور ریسٹ ہاؤس میں ٹھہرایا گیا، ایسا نہیں ہوا کہ ایک ملزم کو دیکھ کر عدالت میں کہا جائے کہ گڈ ٹو سی یو۔
نگراں وزیر داخلہ نے کہا کہ بلوچستان میں کافی وقت کے بعد پیپلز پارٹی نے اتنا بڑا جلسہ کیا، لیول پلیئنگ فیلڈ تھی تو پی پی جلسہ کرپائی۔