الیکشن اکتوبر سے پہلے ہونے کا امکان نہیں ، خواجہ آصف

اسلام آباد : وزیر دفاع خواجہ آصف کا کہنا ہے کہ الیکشن اکتوبر میں ہی ہوں گے، اس سے پہلے انتخابات کا کوئی امکان نہیں۔

تفصیلات کے مطابق وزیر دفاع خواجہ آصف نے پارلیمنٹ کے باہر میڈیا سے گفتگو کرتے ہوئے کہا کہ الیکشن اکتوبر سے پہلے ہونے کا امکان نہیں، الیکشن سے پہلے نواز شریف وطن واپس آئیں گے۔

خواجہ آصف کا کہنا تھا کہ آپ کہتے ہیں کشیدگی ختم ہونی چاہئے، کشیدگی تو ابھی شروع ہوگی، آپ ابھی الیکشن کراتے ہیں پھر اکتوبرمیں بھی کرائیں گے تو کشیدگی تو ہوگی، میں تو اس معاملے پر پنجابی مثال دینا چاہتا ہوں لیکن رہنےدیں۔

وزیردفاع نے کہا کہ ہم آئین کی بات کر رہے ہیں اس میں عمران کی مقبولیت یا خوف کی بات نہیں، مقبولیت ایک ایسی چیز ہے جو کبھی بھی مستحکم نہیں رہتی۔

ان کا مزید کہنا تھا کہ اتارچڑھاؤ آتا رہتا ہے ، بڑے بڑے آئے مقبول بھی ہوئےاورغیر مقبول بھی، ان کو یہ خطرہ ہے کہ مقبولیت کم ہوجائے گی باقی کوئی خطرے والی بات نہیں۔

خواجہ آصف نے واضح کہا کہ الیکشن ایک دن ہی ہوں گے اور اکتوبر میں ہوں گے۔