پشاور۔ خیبر پختونخوا ہیلتھ کیئر کمیشن نے پاکستان سٹیزن پورٹل پر درج ہونے والی شکایت پر کارروائی کرتے ہوتے ڈبگری گارڈن، افغان کالونی، فیصل کالونی، گل بہار، سلطان کالونی اور پتنگ چوک میں 8کلینکس، لیبارٹریوں اور میڈیکل سنٹرز کو سیل کر دیا جبکہ 6 کورجسٹریشن کے نوٹس جاری کر دیئے گئے۔
چیف انسپکٹر اسد اللہ خان، سینئر انسپکٹر سعید الرحمن، امتیاز علی عدنان، انسپکٹر فرحان ودود اور سجاد اللہ خان پر مشتمل ٹیم نے کلینکس، میڈیکل سنٹرز اور لیبارٹریوں کا معائنہ کرتے ہوئے ہومیو پیتھک کی جگہ ایلوپیتھک پریکٹس پر سعادت ہومیو کلینک،غیر کوالیفائیڈ اہلکار رکھنے پر شفیع ڈینٹل کلینک،ایلو پیتھک پریکٹس پر طاہر کلینک، فارمیسی ٹیکنیشن کی ایلوپیتھک پریکٹس پر شفیق کلینک، پی ایم ڈی سی کے ساتھ ڈاکٹر رجسٹر نہ ہونے پر گوہر میڈیکل سنٹر، ہیلتھ کیئر کمیشن کے معیار پر پوری نہ اترنے پر ریسکیو لیبارٹری، ہیلتھ ٹیکنیشن کی جانب سے خدمات کی فراہمی پر بخت روان کلینک اور ڈسپنسر کی جانب سے خدمات کی فراہمی پر خورشید کلینک کو سیل کر دیا گیا۔
اسی طرح ڈینٹل سیگنیچر کلینک، ڈاکٹر محمد اقبال ڈینٹل کلینک، ایمان ہسپتال، عسکری کلیکشن پوائنٹ، گلوبل لیب اینڈ الٹرا ساؤنڈ کلینک اور شاہ فرسٹ ایڈ کلینک کو رجسٹریشن کرانے کے نوٹس جاری کئے گئے۔