ملائیشیا میں ٹرائیپکل خطے کا دنیا کا طویل ترین درخت ’ مینارا‘ دریافت ہوا ہے جس کی لمبائی 328 فٹ ہے۔
بین الاقوامی خبر رساں ادارے کے مطابق یونیورسٹی آف ناٹنگھم کے محققین نے ملائشیا کی ریاست سابا کے علاقے دانم ویلی میں دنیا کا بلند قامت درخت دریافت کیا ہے، جس کی لمبائی 100 میٹر ( 328 فٹ) ہے۔ طویل ترین درخت ہونے کی وجہ سے اس درخت کو مینارا کا نام دیا گیا ہے۔ مینارا ملایا زبان کا لفظ ہے جس کے معنی اونچی اور سیدھی عمارت کے ہیں۔
آکسفورڈ یونیورسٹی کے محققین نے جنگل بورنیو میں ہونے والی اس دریافت کی لمبائی کی تصدیق کے لیے تھری ڈی اسکینز کے ساتھ ساتھ ڈرون بھی استعمال کیا جب کہ مقامی پیما اندنگ جامی نے ٹیپ کے ذریعے درخت کی لمبائی ناپی۔ آکسفورڈ اور یونیورسٹی آف ناٹنگھم نے اس دریافت کو اہم کامیابی قرار دیتے ہوئے ماحول اور ارتقا کے مطالعے میں اہم پیشرفت ہونے کی امید کا اظہار کیا ہے۔
سائنس دانوں کا کہنا ہے کہ مرطوب علاقوں میں اتنے بلند قامت درخت نہیں پائے جاتے، یہ دریافت ثابت کرتی ہے کہ ہمارے لیے درختوں کی حفاظت کرنا کتنا ضروری ہے، یہ اپنے اندر ایک ان کہی تاریخ لیے ہوئے ہیں جن کا مطالعہ ارتقائی مرحلوں کو سمجھنے میں کافی مددگار ثابت ہوسکتی ہے۔