.jpg)
ممبئی (نیوز ڈیسک) — دیوالی کے پرمسرت موقع پر پٹاخوں کے بے دریغ استعمال کے نتیجے میں پیش آنے والے آتشزدگی کے مختلف واقعات میں معروف بھارتی اداکار گُر فتح پیرزادہ کا گھر بھی لپیٹ میں آ گیا، جس پر انہوں نے شدید غصے اور برہمی کا اظہار کیا ہے۔ میڈیا رپورٹس کے مطابق اداکار ممبئی میں ایک تین منزلہ رہائشی عمارت میں مقیم ہیں، جہاں تہوار کے روز جلائے جانے والے پٹاخوں کی وجہ سے ان کے گھر کی بالکنی میں اچانک آگ بھڑک اٹھی۔
گُر فتح پیرزادہ نے اس افسوسناک واقعے کے بعد سوشل میڈیا کا رخ کیا اور اپنے گھر کی جلی ہوئی بالکنی کی تصاویر شیئر کرتے ہوئے انسٹاگرام اسٹوری پر لکھا کہ دیوالی کی شام پٹاخوں کی وجہ سے ان کے گھر کی پوری بالکنی آگ کی زد میں آ گئی، جس کے نتیجے میں بالکنی کے ساتھ منسلک ایک کمرہ بھی بُری طرح متاثر ہوا۔ اداکار نے صورتحال پر شدید تشویش کا اظہار کرتے ہوئے لکھا کہ اس وقت پورا شہر آگ کی لپیٹ میں ہے اور ایک بڑا 'گیس چیمبر' بن چکا ہے۔ اس خطرناک واقعے سے ممبئی کے حالات اور پٹاخوں سے ہونے والے فضائی و جانی نقصان سے آگاہ کرنے کے لیے اداکار نے اپنی سوشل میڈیا پوسٹ میں ممبئی پولیس کو بھی باضابطہ طور پر ٹیگ کیا۔