وزیراعلیٰ پنجاب مریم نواز نے کہا ہے کہ صوبے کے نوجوانوں کے خواب پنجاب کے مستقبل کی بنیاد ہیں اور انہیں آگے بڑھنے کے لیے بھرپور مواقع فراہم کرنا حکومت کی ترجیحات میں شامل ہے۔ ہونہار اسکالرشپ پروگرام سے اب تک ایک لاکھ 60 ہزار باصلاحیت نوجوان مستفید ہوچکے ہیں، جبکہ پروگرام کے اگلے مرحلے کے لیے آن لائن پورٹل بھی کھول دیا گیا ہے۔
سماجی رابطے کی ویب سائٹ ایکس پر طلبہ کے نام اپنے خصوصی پیغام میں مریم نواز نے کہا کہ نوجوانوں کی صلاحیتیں اور بلند عزائم روشن مستقبل کی نوید ہیں۔ ان کے مطابق باصلاحیت طلبہ کو تعلیم کے بہتر مواقع فراہم کرنا صوبے کی ترقی کے لیے اہم ہے۔
ہونہار اسکالرشپ پروگرام میں 70 تعلیمی شعبے شامل
وزیراعلیٰ پنجاب نے بتایا کہ ہونہار اسکالرشپ پروگرام میں مستقبل کی ضروریات کو مدنظر رکھتے ہوئے 70 تعلیمی شعبے شامل کیے گئے ہیں، تاکہ طلبہ کو مختلف شعبوں میں تعلیم حاصل کرنے اور اپنی صلاحیتیں نکھارنے کے مواقع میسر آسکیں۔
انہوں نے کہا کہ یہ پروگرام نوجوانوں کے لیے نئے راستے کھول رہا ہے اور انہیں اپنی تعلیمی منزل حاصل کرنے میں مدد دے رہا ہے۔
طلبہ کو مریم نواز کا خصوصی پیغام
مریم نواز نے طلبہ پر زور دیا کہ وہ اپنی صلاحیتوں پر یقین رکھیں اور محنت و لگن کے ساتھ تعلیم حاصل کریں۔ ان کا کہنا تھا کہ مشکلات کو اپنے خوابوں کی راہ میں رکاوٹ نہ بننے دیں اور دستیاب مواقع سے بھرپور فائدہ اٹھائیں۔
وزیراعلیٰ نے کہا کہ نوجوانوں کی محنت، صلاحیتیں اور آگے بڑھنے کی جستجو قابلِ قدر ہیں، جبکہ ان کی کامیابیاں پنجاب کے مستقبل کی تشکیل میں اہم کردار ادا کریں گی۔
اسکالرشپ کے لیے آن لائن درخواستیں دینے کی ہدایت
وزیراعلیٰ پنجاب نے اہل طلبہ کو ہونہار اسکالرشپ پروگرام کے نئے مرحلے کے لیے درخواست دینے کی ترغیب دی۔ انہوں نے کہا کہ طلبہ آن لائن پورٹل کے ذریعے درخواست دے کر اپنے خوابوں کی تعبیر کی جانب اگلا قدم بڑھائیں۔
واضح رہے کہ پنجاب حکومت نے ہونہار اسکالرشپ پروگرام اکتوبر 2024 میں متعارف کرایا تھا۔ فراہم کردہ تفصیلات کے مطابق اس پروگرام کے لیے 130 ارب روپے مختص کیے گئے تھے، جبکہ ابتدائی منصوبے میں سرکاری شعبے کی جامعات کے طلبہ کو انڈرگریجویٹ ڈگری پروگراموں کے لیے اسکالرشپس فراہم کرنا شامل تھا۔
حکومت کے مطابق پروگرام کا مقصد باصلاحیت طلبہ کو تعلیمی مواقع فراہم کرنا اور مالی مشکلات کو ان کی تعلیم کی راہ میں رکاوٹ بننے سے روکنا ہے۔