آلو کی پیداوار کے لیے عالمی شہرت رکھنے والی امریکی ریاست آئیڈاہو نے فرنچ فرائز کی سب سے بڑی مقدار تیار کرنے کا گنیز ورلڈ ریکارڈ بھارت سے واپس چھین کر ایک بار پھر اپنے نام کر لیا ہے۔ شہر بوائز میں منعقدہ ’بوائز پوٹیٹو ڈیز‘ کے دوران آئیڈاہو پوٹیٹو کمیشن اور فوڈ چین ’اسپڈ ڈیڈی‘ نے مشترکہ طور پر تقریباً 668.6 کلو گرام تازہ اور لذیذ فرنچ فرائز تیار کیے۔ اس بڑے کارنامے کو سرانجام دینے کے لیے تقریباً 771.1 کلو گرام خالص آئیڈاہو آلو استعمال کیے گئے، جنہیں تلنے کے لیے چھ بڑے ڈیپ فرائیرز کا استعمال کیا گیا جبکہ تقریباً 50 افراد نے اس پوری تیاری کے عمل میں حصہ لیا۔ یاد رہے کہ اس سے قبل یہ اعزاز بھارت کے پاس تھا جہاں 2018 میں تقریباً 658.9 کلو گرام فرنچ فرائز تیار کر کے ریکارڈ بنایا گیا تھا، جبکہ اس سے بھی پہلے 2014 میں آئیڈاہو نے ہی پہلی مرتبہ یہ ریکارڈ قائم کیا تھا۔ آئیڈاہو پوٹیٹو کمیشن کے صدر اور چیف ایگزیکٹو آفیسر جیمی ہائیہم نے اس کامیابی پر خوشی کا اظہار کرتے ہوئے کہا کہ آلو کی بہترین فصل کے حامل اس خطے کا یہ حق بنتا ہے کہ یہ اعزاز اسی کے پاس رہے، اور اس کوشش کا بنیادی مقصد ریاست کے محنتی کاشت کاروں اور آلو کی صنعت سے وابستہ تمام افراد کی شاندار خدمات کو خراجِ تحسین پیش کرنا ہے۔
.jpg)
3