شینیل کے ریزارٹ 2027 شو میں “غائب جوتے” نما سینڈلز، فیشن حلقوں میں نئی بحث

پیرس: عالمی شہرت یافتہ لگژری فیشن برانڈ شینیل نے اپنے ریزارٹ 2027 فیشن شو میں ایک ایسا غیر روایتی اور منفرد جوتا متعارف کرایا ہے جس نے فیشن انڈسٹری اور سوشل میڈیا پر نئی بحث چھیڑ دی ہے۔

شو کے دوران ماڈلز ایسے ہیلز نما سینڈلز پہن کر ریمپ پر چلیں جن میں پاؤں کا نچلا حصہ مکمل طور پر نمایاں تھا، جبکہ صرف ٹخنے کے گرد ایک باریک پٹی موجود تھی۔ اس ڈیزائن کو دیکھ کر یوں محسوس ہوتا تھا جیسے جوتا موجود ہی نہیں، بلکہ صرف اس کا تصور باقی رہ گیا ہو۔

ان سینڈلز کی قیمت تقریباً 1500 امریکی ڈالر (پاکستانی کرنسی میں لگ بھگ 4 لاکھ 18 ہزار روپے) بتائی جا رہی ہے، جس پر صارفین کی جانب سے ملا جلا ردعمل سامنے آیا ہے۔ بعض افراد نے اسے غیر عملی اور محض نمائشی قرار دیا، جبکہ دیگر نے اسے جدید فیشن میں ایک تخلیقی اور جرات مندانہ تجربہ کہا۔

فیشن ماہرین کے مطابق یہ ڈیزائن روایتی جوتوں کے تصور کو چیلنج کرتا ہے اور اسے ایک علامتی اظہار میں بدل دیتا ہے، جس میں جوتا صرف استعمال کی شے نہیں بلکہ ایک خیال اور جمالیاتی تصور کے طور پر پیش کیا گیا ہے۔

ماہرین کے مطابق یہ ڈیزائن شینیل کی اس فکری روایت سے بھی جڑا ہے جس میں سادگی، آزادی اور منفرد طرزِ زندگی کو اہمیت دی جاتی ہے۔ کچھ مبصرین نے اسے ساحل سمندر پر ننگے پاؤں چلنے کے احساس سے تعبیر کیا ہے، جہاں عملی استعمال سے زیادہ تصوراتی خوبصورتی کو اجاگر کیا گیا ہے۔

فیشن انڈسٹری میں اس نوعیت کے تجرباتی ڈیزائن پہلے بھی سامنے آتے رہے ہیں، جن کا مقصد عملی استعمال کے بجائے تخلیقی سوچ اور بحث کو جنم دینا ہوتا ہے۔ شینیل کا یہ نیا ڈیزائن بھی اسی رجحان کی ایک مثال کے طور پر دیکھا جا رہا ہے۔