دنیا بھر: محبت صرف انسانوں کا ہی خاصہ نہیں، بلکہ جانوروں کی دنیا میں بھی حیران کن اور انوکھے انداز موجود ہیں۔ فطرت میں نسل بڑھانے اور بقا کے لیے جو حکمت عملی اختیار کی جاتی ہے، وہ کبھی کبھی انسانی تہواروں اور رومانوی رسموں کو بھی پیچھے چھوڑ دیتی ہے۔
مچھلی کا محبت نامہ
جاپان کے سمندر میں ایک خاص قسم کی نر مچھلی اپنی مادہ کو متاثر کرنے کے لیے ریت پر خوبصورت گول نقش بناتی ہے۔ یہ نقش خول کے ٹکڑوں سے سجایا جاتا ہے اور تقریباً ایک ہفتہ میں مکمل ہوتا ہے۔ یہ دائرہ نہ صرف مادہ کو لبھاتا ہے بلکہ انڈے دینے کے لیے محفوظ جگہ بھی فراہم کرتا ہے۔ ملاپ کے بعد نر اگلی بار نیا شاہکار تیار کرتا ہے۔
سمندر کی گہرائیوں کی عجیب وابستگی
گہرے سمندر میں ایک قسم کی مچھلی میں نر بہت چھوٹا اور کمزور ہوتا ہے۔ جب وہ بڑی اور چمکدار مادہ ڈھونڈ لیتا ہے تو اس سے چمٹ جاتا ہے اور بعض اوقات مستقل طور پر اس کے جسم کا حصہ بن جاتا ہے۔ مادہ اسے خوراک فراہم کرتی ہے اور نسل بڑھانے کے لیے فائدہ اٹھاتی ہے۔
کٹ جانے والا بازو بھی کام کا
ایک سمندری جاندار میں نر اپنا مخصوص بازو الگ کرکے مادہ تک پہنچاتا ہے تاکہ افزائش کا عمل مکمل ہو سکے۔ حیرت انگیز طور پر یہ بازو علیحدہ ہونے کے بعد بھی کچھ وقت تک متحرک رہتا ہے۔
مکڑیوں کے تحفے اور فریب
کچھ مکڑیاں مادہ کو ریشم میں لپٹا ہوا شکار بطور تحفہ پیش کرتی ہیں تاکہ وہ انہیں نقصان نہ پہنچائے، جبکہ بعض نر مکڑیاں خالی خول یا بے کار چیز لپیٹ کر دھوکا دیتی ہیں۔ اگرچہ یہ چال کبھی کبھار کامیاب ہوتی ہے، مگر مادہ جلد حقیقت جان لیتی ہے۔
پرندوں کا انوکھا ناچ
کچھ نر پرندے مادہ کو متاثر کرنے کے لیے عجیب و غریب ناچ اور رنگ برنگی نمائش کرتے ہیں۔ نسل در نسل یہی انداز اپنایا جاتا ہے تاکہ مادہ کی پسند پر پورا اترا جا سکے۔
کیچوؤں کی تلوار بازی
ایک چپٹے کیڑے میں دونوں ساتھی نر اور مادہ کی خصوصیات رکھتے ہیں اور فیصلہ سوئی نما عضو سے ایک دوسرے پر حملہ کر کے کیا جاتا ہے۔ جو پہلے زخمی ہو، وہ انڈے دینے کی ذمہ داری اٹھاتا ہے۔
یہ تمام مثالیں اس بات کا ثبوت ہیں کہ فطرت میں بقا اور نسل بڑھانے کے لیے حیرت انگیز حکمت عملی اختیار کی جاتی ہے۔ محبت کے یہ انداز عجیب ضرور ہیں، مگر ارتقا نے انہیں کامیاب بنایا ہے۔