وقت سے پہلے دفتر پہنچنے پر خاتون ملازمہ برطرف

سپین کے شہر الیکانٹے میں ایک خاتون ملازمہ کو روزانہ مقررہ وقت سے بہت پہلے دفتر آنے پر کمپنی نے ملازمت سے برطرف کر دیا، جس کے بعد خاتون نے اس اقدام کے خلاف عدالت سے رجوع کیا۔

رپورٹ کے مطابق ملازمہ کی عادت تھی کہ وہ صبح 6:45 سے 7:00 بجے کے درمیان دفتر پہنچ جاتی تھیں، حالانکہ ان کے معاہدے کے مطابق کام کا آغاز 7:30 بجے ہونا تھا۔ وہ اپنے ساتھی ملازمین سے پہلے کام شروع کر دیتی تھیں، جسے کمپنی کے مالک نے غیر مناسب قرار دیا۔

2023 میں انہیں پہلی بار اس رویے پر وارننگ دی گئی، تاہم خاتون نے وقت سے بہت پہلے کام پر پہنچنے کا معمول جاری رکھا۔ رواں سال کے آغاز میں کمپنی نے انہیں سنگین بدانتظامی کے الزام میں برطرف کردیا۔

کمپنی کے مطابق ملازمہ کے پاس وقت سے پہلے پہنچنے کے باعث کام موجود نہیں ہوتا تھا اور ان کا عمل کمپنی کے نظم و ضبط پر منفی اثر ڈال رہا تھا۔ برطرفی کے بعد خاتون نے الیکانٹے کی سوشل کورٹ میں اپیل دائر کی۔

عدالت نے فیصلہ سناتے ہوئے کہا کہ ملازمہ نے متعدد تنبیہات کو نظر انداز کیا اور ان کا رویہ ملازم اور آجر کے درمیان اعتماد کے تعلقات کو متاثر کر رہا تھا۔ عدالت نے اس صورتحال کو کافی سنگین قرار دیتے ہوئے برطرفی کو جائز قرار دے دیا۔